പോർച്ചുഗീസ് സൂപ്പർ താരം ക്രിസ്റ്റ്യാനോ റൊണാൾഡോയുടെയും പങ്കാളി ജോർജീന റോഡ്രിഗസിന്റെയും വിവാഹവേദി ഇരുവരും തീരുമാനിച്ചതായി റിപ്പോർട്ട്. ഫുട്ബോൾ ഇതിഹാസത്തിന്റെ ജന്മദേശമായ പോർച്ചുഗലിലെ മഡെയ്റ (Madeira) ദ്വീപിലാണ് ആഡംബരപൂർണമായ വിവാഹ ചടങ്ങുകൾ നടക്കുക.
റൊണാൾഡോയുടെ ജീവിതത്തിൽ ഏറെ പ്രാധാന്യമുള്ള ഒരു സ്ഥലമാണ് വിവാഹത്തിനായി അദ്ദേഹം തിരഞ്ഞെടുത്തതെന്ന പ്രത്യേകതയുമുണ്ട്. 2026-ലെ ഫിഫ ലോകകപ്പിന് ശേഷം വേനൽക്കാലത്തായിരിക്കും ഇരുവരും വിവാഹിതരാവുക എന്നാണ് പുറത്തുവരുന്ന റിപ്പോർട്ടുകൾ. മഡെയ്റയിലെ ചരിത്രപരമായ ഫഞ്ചൽ കത്തീഡ്രലിൽ (Funchal Cathedral) വെച്ചായിരിക്കും ചടങ്ങുകൾ നടക്കുക. 1514-ൽ സ്ഥാപിച്ച ഈ കത്തീഡ്രൽ ദ്വീപിലെ ഏറ്റവും പഴക്കം ചെന്ന ആരാധനാലയങ്ങളിൽ ഒന്നാണ്.
റൊണാൾഡോ ജനിച്ച ആശുപത്രിയിൽ നിന്ന് ഏകദേശം രണ്ട് മൈൽ മാത്രം ദൂരമുണ്ട് ഈ കത്തീഡ്രലിലേക്ക്. മാത്രമല്ല, അദ്ദേഹം തന്റെ ഫുട്ബോൾ ജീവിതം ആരംഭിച്ച നാഷണൽ ഡാ മഡെയ്റ ക്ലബ്ബിന്റെ മൈതാനവും അടുത്താണ്. ഈ വൈകാരിക അടുപ്പം കൊണ്ടാണ് താരം ജന്മനാട്ടിലെ ഈ വേദി തിരഞ്ഞെടുത്തതെന്നാണ് റിപ്പോർട്ടുകൾ. കത്തീഡ്രലിലെ ചടങ്ങുകൾക്ക് ശേഷം അടുത്തുള്ള ഒരു ആഡംബര ഹോട്ടലിൽ വിവാഹ സൽക്കാരം നടക്കുമെന്നും വിവരമുണ്ട്.
ഏകദേശം ഒരു ദശാബ്ദത്തോളമായി ഒന്നിച്ചുള്ള ജീവിതമാണ് റൊണാൾഡോയും ജോർജീനയും നയിക്കുന്നത്. 2016-ൽ സ്പെയിനിലെ ഒരു ഗുച്ചി സ്റ്റോറിൽ വെച്ചാണ് ഇരുവരും കണ്ടുമുട്ടിയത്. ഈ വർഷം ഓഗസ്റ്റിൽ തങ്ങളുടെ വിവാഹനിശ്ചയം കഴിഞ്ഞ വിവരം ജോർജീന സ്ഥിരീകരിച്ചിരുന്നു. അഞ്ച് മക്കളോടൊപ്പമുള്ള ഈ താരദമ്പതികളുടെ വിവാഹത്തിനായി ലോകമെമ്പാടുമുള്ള ആരാധകർ ആകാംഷയോടെ കാത്തിരിക്കുകയാണ്.