ദുബായ്: ഇന്ത്യാ- പാക് സൂപ്പർ ഫോർ മത്സരത്തിനു മുമ്പേ വിവാദങ്ങൾക്ക് തിരികൊളുത്തി പാക്കിസ്ഥാൻ. ഇത്തവണ കളിക്കു മുൻപുള്ള വാർത്താ സമ്മേളനം ബഹിഷ്കരിച്ചാണ് പാക്കിസ്ഥാൻ പ്രതിഷേധിച്ചത്. ഇതോടെ പാക്കിസ്ഥാന്റെ നിലവിലെ പോയിന്റിൽ നിന്ന് ഒന്ന് കുറയ്ക്കാൻ സാധ്യതയുണ്ടെന്ന് സുനിൽ ഗാവസ്കർ സൂചന നൽകി.
വാർത്താസമ്മേളനം ഉപേക്ഷിച്ച പാക്കിസ്ഥാൻ ടീമിനെതിരെ സുനിൽ ഗാവസ്കർ. ‘‘വാർത്താ സമ്മേളനം ഉപേക്ഷിച്ചതിനു പിന്നിലെ ചിന്ത എന്താണെന്ന് എനിക്കറിയില്ല, പക്ഷേ എനിക്കറിയാവുന്നിടത്തോളം, വാർത്താസമ്മേളനങ്ങൾ നിർബന്ധമാണ്. ടീമുകൾ അവ നടത്തിയില്ലെങ്കിൽ, ശിക്ഷകൾ എന്താണെന്ന് എനിക്കറിയില്ല. എന്നാൽ ഇക്കാലത്ത് മാധ്യമങ്ങളെ ഭാഗമാക്കേണ്ടതും വിവരങ്ങൾ അറിയിക്കേണ്ടതും പ്രധാനമാണ്. മാധ്യമങ്ങളുമായി തുറന്ന ആശയവിനിമയം നിലനിർത്തേണ്ടത് എപ്പോഴും അത്യാവശ്യമാണ്. ഉറവിടങ്ങളെയോ ഊഹാപോഹങ്ങളെയോ ആശ്രയിക്കുന്നതിനുപകരം, ടീമുകൾ അവരുടെ കാഴ്ചപ്പാട് നേരിട്ട് അറിയിക്കുന്നതാണ് എപ്പോഴും നല്ലത്. ഒരുപക്ഷേ, തങ്ങൾക്ക് പങ്കിടാൻ ഒന്നുമില്ലെന്ന് പാക്കിസ്ഥാൻ കരുതുന്നുണ്ടാകാം, അതിൽ അതിശയിക്കാനില്ല.’’- സുനിൽ ഗാവസ്കർ പറഞ്ഞു.
ഇത്തരത്തിൽ പ്രതിഷേധിച്ച പാക്കിസ്ഥാൻ ക്രിക്കറ്റ് ടീമിനു പിഴ ചുമത്തണമെന്നും ഗാവസ്കർ നിർദേശിച്ചു. ‘‘വാർത്താസമ്മേളനങ്ങളിൽ പങ്കെടുക്കുന്നത് നിർബന്ധമാണെന്ന് നിയമത്തിൽ എന്തെങ്കിലും ഉണ്ടെങ്കിൽ, ഒരു ടീം അത് പാലിക്കുന്നതിൽ പരാജയപ്പെട്ടാൽ, അവരുടെ ഒരു പോയിന്റ് കുറയ്ക്കാൻ സാധ്യതയുണ്ട്. അത് മുന്നോട്ടുള്ള ഒരു പ്രായോഗിക മാർഗമാണ്.’– ഗവാസ്‌കർ പറഞ്ഞു.
ഇതിനിടെ, പാക്കിസ്ഥാനെതിരായ സൂപ്പർ ഫോർ മത്സരത്തിനു മുൻപ് സഹതാരങ്ങളോട് എന്താണു പറയാനുള്ളതെന്നു ചോദിച്ചവർക്ക് ഇന്ത്യൻ ക്യാപ്റ്റൻ സൂര്യകുമാർ യാദവ് മറുപടി നൽകി. "നിങ്ങളുടെ റൂം പൂട്ടി അകത്തിരിക്കുക. ഫോൺ സ്വിച്ച് ഓഫ് ചെയ്ത് സുഖമായി ഉറങ്ങുക. പറയാൻ എളുപ്പമാണ്. പക്ഷേ, ഫോണും സ്വിച്ച് ഓഫ് ചെയ്ത് റൂമിന് അകത്തിരിക്കാൻ അത്ര എളുപ്പമല്ലെന്ന് എനിക്കറിയാം. എന്നാൽ പുറത്തുനിന്നുള്ള വിവാദങ്ങളും വിമർശനങ്ങളും ഒഴിവാക്കാൻ അതാണ് നല്ലത്. മത്സരത്തിനായി തയാറെടുക്കുമ്പോൾ മറ്റൊന്നും നിങ്ങളെ അലട്ടരുത്. ജയം മാത്രമായിരിക്കണം ലക്ഷ്യം." – സൂര്യ പറഞ്ഞു.