ലണ്ടൻ: യൂറോകപ്പിനും കോപ്പ അമേരിക്കക്കും ശേഷം ലോകം വീണ്ടും കാൽപന്ത് ആവേശങ്ങളിലേക്ക്. ക്ലബ് ഫുട്‍ബോളിൽ ലോകത്തെ പ്രധാന ലീഗുകൾ ഇന്ന് തുടങ്ങും. സ്പെയിനിൽ ലാലിഗ മത്സരങ്ങൾക്ക് ആരംഭം കുറിച്ചാണ് യൂറോപ്പിൽ ക്ലബ് ലീഗുകൾ സജീവക്കുന്നത്. ഇംഗ്ലീഷ് പ്രീമിയർ ലീഗും ഫ്രഞ്ച് ലീഗ് വണ്ണും വെള്ളിയാഴ്ച്ച ആരംഭിക്കും. ശനിയാഴ്ച ഇറ്റാലിയൻ സീരീ എയും ആഗസ്റ്റ് 23 ജർമൻ ബുണ്ടസ് ലിഗയും തുടങ്ങും.
സ്പാനിഷ് ലീഗിൽ രാത്രി 10.30ന് അത്ലറ്റിക് ക്ലബും ഗെറ്റാഫെയും തമ്മിലാണ് ലാ ലിഗയിലെ ഉദ്ഘാടന മത്സരം. തുടർന്ന് ഒരുമണിക്ക് റയൽ ബെറ്റിസിനെ ജിറോണയും നേരിടും. മുൻ ചാമ്പ്യന്മാരായ ബാഴ്സലോണ ശനിയാഴ്ച്ച വലൻസിയ‍ക്കെതിരെ ആദ്യ അങ്കത്തിനിറങ്ങും. അടുത്ത ദിവസം മയ്യോർക്കക്കെതിരെ റയൽ മാഡ്രിഡും സീസൺ തുടങ്ങും.