ഓസ്ട്രേലിയൻ പേസ് ബൗളർ ജോഷ് ഹേസൽവുഡിന് ആഷസ് 2025-26 ലെ പരമ്പരയിൽ കളിക്കാനായേക്കില്ല. ആദ്യ രണ്ട് ടെസ്റ്റുകളിൽ (പെർത്ത്, ബ്രിസ്ബെയ്ൻ) നിന്ന് വിട്ടുനിൽക്കാൻ കാരണമായ ഹാംസ്ട്രിംഗ് പരിക്കിൽ നിന്നുള്ള പുനരധിവാസത്തിനിടെ കണങ്കാലിൽ ചെറിയ വേദന അനുഭവപ്പെട്ടതാണ് തിരിച്ചടിയായത്.
സിഡ്നിയിൽ ചെറിയ റൺഅപ്പിൽ ബൗളിംഗ് പരിശീലനം പുനരാരംഭിച്ച താരം ബ്രിസ്ബെയ്നിലെ ടീമിനൊപ്പം ചേരാനുള്ള പദ്ധതി ഉപേക്ഷിച്ചു. അടുത്ത ആഴ്ച ഓട്ടവും ബൗളിംഗും പുനരാരംഭിക്കാൻ കഴിയുമെന്നാണ് ക്രിക്കറ്റ് ഓസ്ട്രേലിയ പ്രതീക്ഷിക്കുന്നത്.
ഡിസംബർ 17-21 ന് നടക്കുന്ന മൂന്നാം ടെസ്റ്റ് (അഡ്ലെയ്ഡ്) താരത്തിന് നഷ്ടമാകും. മെൽബണിലോ (ഡിസംബർ 26-30) സിഡ്നിയിലോ (ജനുവരി 4-8) നടക്കുന്ന ടെസ്റ്റുകളിലും താരത്തിന്റെ പങ്കാളിത്തം ഉണ്ടാകാൻ സാധ്യതയില്ല. ക്യാപ്ടൻ പാറ്റ് കമ്മിൻസ് പുറംവേദനയിൽ നിന്ന് മോചിതനായി. ബ്രിസ്ബെയ്ൻ ടെസ്റ്റ് നഷ്ടമായെങ്കിലും അഡ്ലെയ്ഡിനായി ഫിറ്റാണെന്ന് താരം സ്ഥിരീകരിച്ചിട്ടുണ്ട്.