ന്യൂഡൽഹി: ടി20 ലോകകപ്പിലെ തങ്ങളുടെ രണ്ടാം മത്സരത്തിൽ ഇന്ത്യ ഇന്ന് നമീബിയയെ നേരിടും. ഡൽഹിയിലെ അരുൺ ജെയ്റ്റ്ലി സ്റ്റേഡിയത്തിൽ വൈകിട്ട് ഏഴിനാണ് മത്സരം ആരംഭിക്കുന്നത്. അമേരിക്കയ്ക്കെതിരായ ആദ്യ മത്സരത്തിൽ ബാറ്റിംഗ് നിര നിരാശപ്പെടുത്തിയ സാഹചര്യത്തിൽ, വരാനിരിക്കുന്ന പാകിസ്ഥാൻ പോരാട്ടത്തിന് മുൻപ് ഫോം വീണ്ടെടുക്കുക എന്ന ലക്ഷ്യവുമായാണ് സൂര്യകുമാർ യാദവും സംഘവും ഇന്ന് ഇറങ്ങുന്നത്.(ICC T20 World Cup, India vs Namibia match today)
ഇന്ത്യൻ നിരയിൽ ഇന്ന് പ്രധാന മാറ്റങ്ങൾക്ക് സാധ്യതയുണ്ട്. അസുഖം ബാധിച്ച ഓപ്പണർ അഭിഷേക് ശർമ്മ ഇന്ന് കളിച്ചേക്കില്ല. കഴിഞ്ഞ രണ്ട് ദിവസമായി താരം പരിശീലനത്തിൽ നിന്ന് വിട്ടുനിൽക്കുകയാണ്. ഈ സാഹചര്യത്തിൽ സഞ്ജു സാംസൺ ഇഷാൻ കിഷന്റെ ഓപ്പണിംഗ് പങ്കാളിയായി ടീമിലെത്തിയേക്കും. ന്യൂസിലൻഡ് പരമ്പരയിൽ ഫോം കണ്ടെത്താൻ പ്രയാസപ്പെട്ട സഞ്ജുവിന് തന്റെ മികവ് തെളിയിക്കാനുള്ള സുവർണ്ണാവസരമായിരിക്കും ഈ മത്സരം.
പരിക്കിൽ നിന്ന് മോചിതനായി ജസ്പ്രീത് ബുമ്ര ടീമിലേക്ക് തിരിച്ചെത്തുന്നത് ഇന്ത്യയ്ക്ക് വലിയ കരുത്താകും. ഓൾറൗണ്ടർ വാഷിംഗ്ടൺ സുന്ദറും പ്ലെയിംഗ് ഇലവനിൽ ഇടംപിടിക്കാൻ സജ്ജനായിട്ടുണ്ട്. മുഖ്യ പരിശീലകൻ ഗൗതം ഗംഭീറിന്റെ ഹോം ഗ്രൗണ്ടിൽ നടക്കുന്ന മത്സരമാണിത്.
