തിരുവനന്തപുരം: ശബരിമല ദർശനം കഴിഞ്ഞ് മടങ്ങുന്ന ഭക്തർക്ക് സുരക്ഷ ഉറപ്പാക്കുന്നതിന്റെ ഭാഗമായി നിർണായക ജാഗ്രതാ നിർദേശങ്ങളുമായി പോലീസ് രംഗത്ത്. മലയിറങ്ങിയ ശേഷം വിശ്രമമില്ലാതെ ദീർഘദൂര യാത്രകൾ ചെയ്യുന്നതും വാഹനം ഓടിക്കുന്നതും ഗുരുതരമായ അപകടങ്ങൾക്ക് കാരണമാകുന്ന സാഹചര്യത്തിലാണ് ഈ മുന്നറിയിപ്പ്.(Kerala Police issues precautionary measures to Sabarimala pilgrims)
ക്ഷീണിച്ചുള്ള ഡ്രൈവിംഗ് ഒഴിവാക്കുക.കഠിനമായ വ്രതാനുഷ്ഠാനങ്ങളും ദീർഘമായ കാൽനടയാത്രയും കഴിഞ്ഞ് അയ്യപ്പദർശനം നേടി മടങ്ങുന്ന ഭക്തരുടെ ശരീരവും മനസ്സും അതിയായ ക്ഷീണത്തിലായിരിക്കും. ഉറക്കക്കുറവ്, ശരീരവേദന, മാനസിക ക്ഷീണം എന്നിവ ഡ്രൈവിങ്ങിനെ പ്രതികൂലമായി ബാധിക്കാൻ സാധ്യതയുണ്ട്.
സ്വന്തം ജീവനും ഒപ്പം യാത്ര ചെയ്യുന്നവരുടെയും മറ്റ് വഴിയാത്രക്കാരുടെയും ജീവനും ഡ്രൈവറുടെ ജാഗ്രതയിൽ ആശ്രയിച്ചിരിക്കുന്നതിനാൽ, മാനസികമായും ശാരീരികമായും പൂർണ്ണ ആരോഗ്യനിലയിൽ ആയിരിക്കുമ്പോൾ മാത്രമേ ഡ്രൈവിംഗ് ചെയ്യാവൂ എന്ന് പോലീസ് ഓർമ്മിപ്പിക്കുന്നു.
ദീർഘദൂര യാത്രകൾക്ക് ഒരു പ്രത്യേക ഡ്രൈവറെ ഒപ്പം കൂട്ടാൻ ശ്രമിക്കുക. ആവശ്യമായ ഉറക്കവും വിശ്രമവും എടുത്തതിനുശേഷം മാത്രം യാത്ര തുടരുക. മടക്കയാത്ര ആവശ്യാനുസരണം ഇടവേളകളായി വിഭജിച്ച് ക്ഷീണമകറ്റിയ ശേഷം മാത്രം മുന്നോട്ട് പോകുക.
കൂടെയുള്ള യാത്രക്കാർ ഡ്രൈവറോടൊപ്പം ഉറങ്ങാതെ ജാഗ്രതയോടെ സജീവമായി ഇരിക്കണം. ഡ്രൈവറുമായി സംസാരിച്ച് ജാഗ്രതയിൽ നിലനിർത്തുക, ക്ഷീണം തോന്നുന്നുണ്ടെങ്കിൽ ഉടൻ വിശ്രമിക്കാൻ പ്രോത്സാഹിപ്പിക്കുക. ഒരു നിമിഷത്തെ അശ്രദ്ധയും അമിത ആത്മവിശ്വാസവും വലിയ ദുരന്തങ്ങൾക്ക് വഴിയൊരുക്കാം. ഭക്തിയോടെ തുടങ്ങിയ യാത്ര സുരക്ഷയോടെ അവസാനിപ്പിക്കുകയാണ് യഥാർത്ഥ അയ്യപ്പസ്മരണയെന്നും പോലീസ് കൂട്ടിച്ചേർത്തു.