ന്യൂഡൽഹി: ഭാരത് മണ്ഡപത്തിൽ നടന്ന ആഗോള എഐ ഉച്ചകോടിയിലെ നാടകീയ പ്രതിഷേധങ്ങളുമായി ബന്ധപ്പെട്ട് രണ്ട് യൂത്ത് കോൺഗ്രസ് പ്രവർത്തകരെ കൂടി ഡൽഹി പോലീസ് അറസ്റ്റ് ചെയ്തു (Global AI Summit Protest). നേരത്തെ പിടിയിലായ അഞ്ച് പ്രതികളെ പട്യാല ഹൗസ് കോടതി അഞ്ച് ദിവസത്തെ പോലീസ് കസ്റ്റഡിയിൽ വിട്ടിരുന്നു. ഇതിന് പിന്നാലെയാണ് കൂടുതൽ അറസ്റ്റുകൾ രേഖപ്പെടുത്തിയിരിക്കുന്നത്.
അതേസമയം , പ്രതിഷേധത്തിന് പിന്നിലെ ഗൂഢാലോചനയെക്കുറിച്ചും ഇവർക്ക് ലഭിച്ച സാമ്പത്തിക സഹായത്തെക്കുറിച്ചും പോലീസ് വിശദമായ അന്വേഷണം നടത്തിവരികയാണ്. പ്രതിഷേധത്തിന്റെ ലക്ഷ്യം, ഇതിൽ പങ്കെടുത്ത മറ്റുള്ളവർ, ആസൂത്രണം ചെയ്ത രീതി എന്നിവ കസ്റ്റഡിയിലുള്ളവരിൽ നിന്ന് പോലീസ് ചോദിച്ചറിയും.
ഇന്ത്യ-യുഎസ് വ്യാപാര കരാറിനെതിരെയും കേന്ദ്ര സർക്കാരിന്റെ കർഷക വിരുദ്ധ നയങ്ങൾ ആരോപിച്ചുമായിരുന്നു ഉച്ചകോടിയുടെ അഞ്ചാം ദിവസം യൂത്ത് കോൺഗ്രസ് പ്രവർത്തകർ പ്രതിഷേധിച്ചത്. പ്രദർശന ഹാളിനുള്ളിൽ ഷർട്ട് ഊരി നടത്തിയ പ്രതിഷേധം വലിയ സുരക്ഷാ വീഴ്ചയായാണ് വിലയിരുത്തപ്പെടുന്നത്.
ഉന്നതതല നയതന്ത്ര പ്രതിനിധികളും സാങ്കേതിക വിദഗ്ധരും പങ്കെടുത്ത രാജ്യാന്തര വേദിയിൽ പ്രതിഷേധം നടന്നത് കേന്ദ്ര ഏജൻസികളെയും ഡൽഹി പോലീസിനെയും പ്രതിരോധത്തിലാക്കിയിട്ടുണ്ട്. വരും ദിവസങ്ങളിൽ കൂടുതൽ പേർ അറസ്റ്റിലാകാൻ സാധ്യതയുണ്ടെന്നാണ് സൂചന.
Story Summary: Two more Youth Congress activists were arrested in connection with the protest at the Global AI Summit in Bharat Mandapam, taking the total count to seven. The Patiala House Court has granted 5-day police custody of the accused to investigate the conspiracy and funding behind the protest.
