ബംഗളൂരു : നഗരത്തിൽ കവര്‍ച്ചാ ശ്രമത്തിനിടെ സ്ത്രീയുടെ വിരലുകള്‍ വെട്ടിമാറ്റി ഏഴ് പവന്‍റെ സ്വര്‍ണം കവർന്ന സംഭവത്തിൽ രണ്ട് പേർ അറസ്റ്റിൽ. പ്രവീണ്‍, യോഗാനന്ദ എന്നിവരാണ് പോലീസ് അറസ്റ്റ് ചെയ്‌തത്‌.
പ്രത്യേക അന്വേഷണ സംഘത്തിന്റെ ആഴ്ചകള്‍ നീണ്ട അന്വേഷണത്തിനൊടുവിലാണ് പ്രതികള്‍ പിടിയിലായത്. സെപ്റ്റംബര്‍ 13-നാണ് കേസിനാസ്പദമായ കവർച്ച നടന്നത്.ഗണേശോത്സവത്തില്‍ പങ്കെടുത്ത് മടങ്ങുകയായിരുന്ന ഉഷ, വരലക്ഷ്മി എന്നീ രണ്ട് സ്ത്രികളെയാണ് മോഷ്ടാക്കള്‍ ആക്രമിച്ചത്. ബൈക്കില്‍ എത്തിയ സംഘം ഈ സ്ത്രീകളെ ഭീഷണിപ്പെടുത്തി സ്വര്‍ണം നല്‍കാന്‍ ആവശ്യപ്പെടുകയായിരുന്നു.
ഉഷ തന്‍റെ സ്വര്‍ണമാല ഊരി നല്‍കി. എന്നാല്‍, വരലക്ഷ്മി സ്വര്‍ണം നല്‍കാന്‍ തയ്യാറായില്ല. ഇതേ തുടര്‍ന്ന് വരലക്ഷ്മിയെ വടിവാള്‍ കൊണ്ട് ആക്രമിച്ച ശേഷം ഇവരുടെ രണ്ട് വിരലുകള്‍ വെട്ടിമാറ്റികയായിരുന്നു.