അഹമ്മദാബാദ്: രാജ്യത്തുടനീളം സൈബർ തട്ടിപ്പുകൾ വർധിക്കുന്നതിനിടെ, അഹമ്മദാബാദിൽ നിന്ന് ഞെട്ടിക്കുന്ന ഒരു തട്ടിപ്പ് കേസ് റിപ്പോർട്ട് ചെയ്തു. ക്വിക്ക് കൊമേഴ്സ് പ്ലാറ്റ്ഫോമിൽ നിന്ന് ഓർഡർ ചെയ്ത പച്ചക്കറിയുടെ 24 രൂപ റീഫണ്ട് ലഭിക്കുന്നതിനായി ശ്രമിച്ച വനിതയ്ക്ക് 87,000 രൂപയോളം നഷ്ടമായ സംഭവമാണിത്.(Woman loses Rs 87,000 after trying to get Rs 24 refund! Shocking scam)
സെപ്റ്റോ എന്ന ക്വിക്ക് കൊമേഴ്സ് പ്ലാറ്റ്ഫോമിൽ നിന്നാണ് ഈ വനിത 24 രൂപയുടെ വഴുതനങ്ങ ഓർഡർ ചെയ്തത്. അവർ നേർത്ത വഴുതനങ്ങയാണ് ആവശ്യപ്പെട്ടിരുന്നതെങ്കിലും, ഡെലിവറി ഏജന്റ് എത്തിച്ചത് വലിയ വഴുതനങ്ങകളായിരുന്നു. ഇതോടെ അവർ പച്ചക്കറി തിരികെ നൽകി റീഫണ്ടിനായി ശ്രമിച്ചു.
ഡെലിവറി ഏജന്റ് വഴി റീഫണ്ട് ലഭിക്കില്ലെന്ന് അറിയിച്ചതോടെ, ആപ്പ് വഴി കസ്റ്റമർ കെയറിൽ ബന്ധപ്പെടാൻ അവർക്ക് നിർദ്ദേശം ലഭിച്ചു. ഔദ്യോഗിക കസ്റ്റമർ കെയർ നമ്പർ കണ്ടെത്താൻ കഴിയാതെ വന്നതോടെ, വനിത ഗൂഗിളിൽ സെപ്റ്റോയുടെ ഹെൽപ്പ്ലൈൻ തിരഞ്ഞു.
ഗൂഗിളിൽ നിന്ന് ലഭിച്ച വ്യാജ കസ്റ്റമർ കെയർ നമ്പറാണ് ഇവരെ തട്ടിപ്പിലേക്ക് നയിച്ചതെന്നാണ് പ്രാഥമിക നിഗമനം. ഈ നമ്പറിൽ ബന്ധപ്പെട്ടതിനെ തുടർന്ന് ഫിഷിങ് ലിങ്കുകൾ വഴി ഇവരുടെ അക്കൗണ്ടിലെ പണം തട്ടിയെടുക്കുകയായിരുന്നു.