ബറേലി: ഉത്തർപ്രദേശിലെ ബറേലിയിൽ ജിം പരിശീലകനൊപ്പം വിവാഹിതയായ യുവതി ഒളിച്ചോടിയതിനെ തുടർന്ന് നാട്ടിൽ സംഘർഷാവസ്ഥ. ഇതര മതസ്ഥനായ ജിം പരിശീലകനൊപ്പമാണ് അഞ്ച് വയസ്സുള്ള മകനെയും ഭർത്താവിനെയും ഉപേക്ഷിച്ച് യുവതി പോയത്. സംഭവത്തിൽ പ്രതിഷേധവുമായി ഹിന്ദു സംഘടനകൾ രംഗത്തെത്തി.(Woman in UP eloped with gym trainer of a different religion)
സംഭവം ചോദ്യം ചെയ്യാനെത്തിയ യുവതിയുടെ സഹോദരനെ കാമുകൻ ക്രൂരമായി മർദ്ദിച്ചുവെന്ന ആരോപണമാണ് സംഘർഷത്തിന് തിരികൊളുത്തിയത്. ഗുരുഗ്രാമിൽ ജോലി ചെയ്യുന്ന ഭർത്താവുമായി വഴക്കിട്ടാണ് യുവതി ആറ് മാസം മുമ്പ് ബറേലിയിലെ അമ്മയുടെ വീട്ടിലെത്തിയത്. ഇവിടെ ഒരു ജിമ്മിൽ പരിശീലകയായി ചേർന്നു.
ജോലിക്കിടെ ജിം പരിശീലകനായ ഷോയിബുമായി (30) യുവതി സൗഹൃദത്തിലാവുകയും പിന്നീട് അത് പ്രണയമായി വളരുകയും ചെയ്തു. വീട്ടുകാർക്ക് ബന്ധത്തിൽ സംശയം തോന്നിയതിനെ തുടർന്ന് യുവതിയെ ഗുരുഗ്രാമിലുള്ള ഭർത്താവിന്റെ അടുത്തേക്ക് തിരിച്ചയച്ചു. എന്നാൽ, കുറച്ച് ദിവസങ്ങൾക്കകം ഭർത്താവുമായി വഴക്കിട്ട് യുവതി ഷോയിബിനൊപ്പം താമസിക്കാൻ തുടങ്ങി. ഭാര്യ വീടുവിട്ടുപോയ വിവരം ഭർത്താവ് വീട്ടുകാരെ അറിയിച്ചു.
വ്യാഴാഴ്ച, യുവതിയുടെ സഹോദരൻ ജിമ്മിലെത്തി സഹോദരിയോട് വീട്ടിലേക്ക് മടങ്ങാൻ ആവശ്യപ്പെട്ടു. ഇതോടെ ഷോയിബും യുവതിയും ചേർന്ന് സഹോദരനെ മർദ്ദിച്ചതായി ആരോപണമുയർന്നു. ഷോയിബും ജിം ഉടമയായ അഭയ് ഉപാധ്യായയും ചേർന്ന് തന്നെ ക്രൂരമായി മർദ്ദിച്ചുവെന്ന് സഹോദരൻ പരാതിയിൽ പറയുന്നു.
മർദ്ദനവിവരം അറിഞ്ഞ് യുവതിയുടെ അമ്മയും സഹോദരിയും മറ്റ് കുടുംബാംഗങ്ങളും സ്ഥലത്തെത്തി. യുവതിയുടെ അമ്മ ഹിന്ദു സംഘടനാപ്രവർത്തകയായതിനാൽ സംഘടനയിലെ ആളുകളുമായാണ് ഇവർ എത്തിയത്. ഇതോടെ സ്ഥലത്ത് തടിച്ചുകൂടിയ ബജ്‌റംഗ് ദൾ, വിശ്വഹിന്ദു പരിഷത്ത് ഉൾപ്പെടെയുള്ള നിരവധി ഹൈന്ദവ സംഘടനകൾ നാല് മണിക്കൂറോളം റോഡ് ഉപരോധിച്ചു. ഇത് പ്രദേശത്ത് വലിയ ഗതാഗതക്കുരുക്കിനും സംഘർഷാവസ്ഥയ്ക്കും ഇടയാക്കി.
ഗതാഗതക്കുരുക്കിനെക്കുറിച്ച് വിവരം ലഭിച്ചതിനെ തുടർന്ന് ഇസ്സാത് നഗർ പോലീസ് സ്ഥലത്തെത്തി. യുവതിയുടെ സഹോദരൻ നൽകിയ പരാതിയുടെ അടിസ്ഥാനത്തിൽ, ഷോയിബിനും ജിം ഉടമ അഭയ് ഉപാധ്യായക്കുമെതിരെ ഗുരുതരമായ കുറ്റങ്ങൾ ചുമത്തി എഫ്‌ഐആർ രജിസ്റ്റർ ചെയ്തു. യുവതിയെ പോലീസ് കസ്റ്റഡിയിലെടുത്തിട്ടുണ്ട്.സംഭവത്തെ തുടർന്ന് ബറേലിയിൽ പോലീസ് സുരക്ഷ ശക്തമാക്കിയിട്ടുണ്ട്.