ബെംഗളൂരു: യുവതി കൂട്ടബലാത്സംഗത്തിന് ഇരയായി, വീട്ടിൽ അതിക്രമിച്ച് കയറിയ അഞ്ചംഗ സംഘത്തിലെ മൂന്നുപേരാണ് ബ്യൂട്ടിപാർലർ ജീവനക്കാരിയായ കൊൽക്കത്ത സ്വദേശിനിയെ ക്രൂരമായി ബലാത്സംഗം ചെയ്തത്. സംഭവവുമായി ബന്ധപ്പെട്ട് സംഘത്തിലെ രണ്ടുപേർ പിടിയിലായിട്ടുണ്ട്. അയൽക്കാരിയായ ഒരു അധ്യാപിക നൽകിയ ക്വട്ടേഷനാണോ സംഭവത്തിന് പിന്നിൽ എന്നും പോലീസിന് സംശയമുണ്ട്.(Woman gang-raped in Bengaluru, 2 out of 5 arrested)
ബെംഗളൂരു ഗംഗോണ്ടനഹള്ളിയിൽ വാടകയ്ക്ക് താമസിക്കുന്ന യുവതിയാണ് കഴിഞ്ഞ ദിവസം രാത്രി കൂട്ടബലാത്സംഗത്തിന് ഇരയായത്. വീട്ടിൽ അതിക്രമിച്ചു കയറിയ അഞ്ചംഗ സംഘം യുവതിയെ ഭീഷണിപ്പെടുത്തുകയും പണവും ആഭരണങ്ങളും ആവശ്യപ്പെടുകയുമായിരുന്നു. യുവതി എതിർത്തതോടെ സംഘത്തിലെ മൂന്നുപേർ ചേർന്ന് ആക്രമിച്ചു. മൂന്നംഗ സംഘം യുവതിയെ ബലാത്സംഗം ചെയ്യുമ്പോൾ മറ്റ് രണ്ടുപേർ പുറത്ത് കാവൽ നിന്നു. പ്രതികൾ പോയതിന് പിന്നാലെ യുവതി പോലീസിൽ വിവരമറിയിച്ചു.
ഉടൻ സ്ഥലത്തെത്തിയ പോലീസ് അതിക്രമത്തിന് കാവൽ നിന്ന രണ്ടുപേരെയും കണ്ടെത്തി. യുവതിയെ ആക്രമിച്ച മൂന്നുപേർ ഒളിവിലാണ്. ഇവർക്കായി അന്വേഷണം നടക്കുന്നതായി മദനായ്ക്കനഹള്ളി പോലീസ് അറിയിച്ചു.
സംഭവത്തിന് പിന്നിൽ അയൽക്കാരി നൽകിയ ക്വട്ടേഷനാണോ എന്ന് പോലീസ് സംശയിക്കുന്നു. ബ്യൂട്ടീഷ്യനായി ജോലി ചെയ്യുന്ന യുവതിയെ തേടി കസ്റ്റമേഴ്‌സ് എത്തുന്നത് ഫ്ലാറ്റിലെ മറ്റ് താമസക്കാർക്ക് അലോസരമുണ്ടാക്കിയിരുന്നു. യുവതിയെ ഒഴിപ്പിക്കണമെന്ന് ആവശ്യപ്പെട്ട് അയൽവാസിയായ ഒരു അധ്യാപിക ഫ്ലാറ്റ് ഉടമയെ സമീപിച്ചെങ്കിലും ഫലമുണ്ടായില്ല. തുടർന്ന്, ഇവരുടെ ഒരു വിദ്യാർത്ഥിയുടെ സഹായത്തോടെ യുവതിയെ ഭീഷണിപ്പെടുത്തി ഒഴിപ്പിക്കാൻ ഏർപ്പാടാക്കിയ ഗുണ്ടകളാണ് അതിക്രമം നടത്തിയതെന്നാണ് പോലീസിന്റെ പ്രാഥമിക നിഗമനം.