ഡെറാഡൂൺ: പ്രസവത്തിനിടെ വയറിനുള്ളിൽ ബാൻഡേജ് മറന്നുവെച്ചതുമൂലമുണ്ടായ അണുബാധ കാരണം യുവതി മരിച്ച സംഭവത്തിൽ അന്വേഷണ സംഘം രൂപീകരിച്ചു. ഡെറാഡൂൺ ചീഫ് മെഡിക്കൽ ഓഫീസർ മനോജ് ശർമ്മയുടെ നേതൃത്വത്തിലാണ് നാലംഗ സമിതിയെ സംഭവത്തെക്കുറിച്ച് അന്വേഷിക്കാൻ നിയോഗിച്ചത്. മരിച്ച യുവതിയുടെ ഭർത്താവ് പ്രജ്വൽ പാൽ നൽകിയ പരാതിയുടെ അടിസ്ഥാനത്തിലാണ് കമ്മിറ്റി രൂപീകരിച്ചത്. ജ്യോതി പാൽ എന്ന യുവതിയാണ് മരണമടഞ്ഞത്.(Woman dies in Dehradun after forgetting bandage on stomach during delivery, four-member committee to investigate)
ഈ വർഷം ജനുവരിയിലാണ് ഈ ദാരുണ സംഭവത്തിന്റെ തുടക്കം. ഐ ആൻഡ് മദർ കെയർ സെന്ററിൽ വെച്ച് സിസേറിയനിലൂടെ ജ്യോതി പാൽ ഒരു ആൺകുട്ടിക്ക് ജന്മം നൽകിയതായി പരാതിയിൽ പറയുന്നു. സിസേറിയൻ നടത്തുന്നതിനിടെ ഡോക്ടർമാർ ബാൻഡേജ് വയറ്റിൽ ഉപേക്ഷിച്ച് വയർ തുന്നിച്ചേർത്തതായാണ് ആരോപണം.
പ്രസവം കഴിഞ്ഞ് കുറച്ച് ദിവസങ്ങൾക്ക് ശേഷം ജ്യോതിക്ക് കഠിനമായ വയറുവേദന അനുഭവപ്പെടാൻ തുടങ്ങി. തുടർന്ന് അവരെ അതേ ആശുപത്രിയിൽ കൊണ്ടുപോയെങ്കിലും വയറുവേദനയുടെ കാരണം ഡോക്ടർമാർ കണ്ടെത്താനായില്ല. പിന്നീട്, സ്ഥിതി മോശമായപ്പോൾ മറ്റൊരു ആശുപത്രിയിലേക്ക് യുവതിയെ കൊണ്ടുപോയി. അവിടെ നടത്തിയ സ്കാനിംഗിലാണ് യുവതിയുടെ വയറ്റിൽ ഒരു ബാൻഡേജ് ഉണ്ടായിരുന്നതായി കണ്ടെത്തിയത്. ഇതാണ് ഗുരുതരമായ അണുബാധയ്ക്ക് കാരണമായതെന്നും, ഈ അണുബാധ മൂലമാണ് ജ്യോതി മരിച്ചതെന്നും പിന്നീട് കണ്ടെത്തുകയായിരുന്നു.