സംഭൽ: ഉത്തർപ്രദേശിലെ സംഭലിൽ ഭർത്താവിനെ ക്രൂരമായി കൊലപ്പെടുത്തിയ ശേഷം മൃതദേഹം ഗ്രൈൻഡർ ഉപയോഗിച്ച് വെട്ടിനുറുക്കി പുഴയിൽ തള്ളിയ ഭാര്യയും കാമുകനും പിടിയിൽ (Crime). ചന്ദൗസി സ്വദേശിയായ രാഹുൽ (38) ആണ് കൊല്ലപ്പെട്ടത്. സംഭവത്തിൽ രാഹുലിന്റെ ഭാര്യ റൂബിയെയും കാമുകൻ ഗൗരവിനെയും പോലീസ് അറസ്റ്റ് ചെയ്തു.
നവംബർ 18-നാണ് രാഹുലിനെ കാണാനില്ലെന്ന് കാട്ടി റൂബി പോലീസിൽ പരാതി നൽകിയത്. എന്നാൽ ഡിസംബർ 15-ന് ഈദ്ഗാഹ് പ്രദേശത്തെ ഓടയിൽ നിന്ന് തലയും കൈകാലുകളും ഇല്ലാത്ത നിലയിൽ ഒരു മൃതദേഹം കണ്ടെടുത്തു. മൃതദേഹത്തിൽ 'രാഹുൽ' എന്ന് ടാറ്റൂ ചെയ്തിരുന്നത് പോലീസിന് നിർണ്ണായക തെളിവായി. തുടർന്ന് നടത്തിയ അന്വേഷണത്തിൽ റൂബിയെയും ഗൗരവിനെയും പോലീസ് ചോദ്യം ചെയ്യുകയും ഇവർ കുറ്റം സമ്മതിക്കുകയുമായിരുന്നു.
തങ്ങളുടെ അവിഹിത ബന്ധം രാഹുൽ കണ്ടെത്തിയതിനെത്തുടർന്നാണ് കൊലപാതകം ആസൂത്രണം ചെയ്തതെന്ന് പ്രതികൾ മൊഴി നൽകി. ഇരുമ്പ് ദണ്ഡും ഉരലും ഉപയോഗിച്ച് അടിച്ചുകൊന്ന ശേഷം, മരങ്ങൾ മുറിക്കാൻ ഉപയോഗിക്കുന്ന ഗ്രൈൻഡർ ഉപയോഗിച്ച് മൃതദേഹം കഷ്ണങ്ങളാക്കുകയായിരുന്നു. ശരീരത്തിന്റെ ഒരു ഭാഗം ഓടയിൽ തള്ളുകയും ബാക്കി ഭാഗങ്ങൾ രാജ്ഘട്ടിലെ ഗംഗാനദിയിൽ ഒഴുക്കുകയും ചെയ്തു. കൊലപാതകത്തിന് ഉപയോഗിച്ച ഗ്രൈൻഡറും മറ്റ് ആയുധങ്ങളും പോലീസ് കണ്ടെടുത്തിട്ടുണ്ട്. പ്രതികൾക്കെതിരെ ഭാരതീയ ന്യായ സംഹിത പ്രകാരം കേസെടുത്തു.
A woman named Ruby and her lover Gaurav were arrested in Uttar Pradesh for murdering her husband, Rahul, and dismembering his body with a wood grinder. After being caught in an illicit relationship, the duo killed Rahul with an iron rod and used a grinder to dispose of the body parts in a drain and the Ganga river. The crime came to light after police recovered a mutilated torso and linked it to a missing person report filed by the wife herself.