ന്യൂഡൽഹി: ബംഗ്ലാദേശ് പേസർ മുസ്തഫിസുർ റഹ്മാനെ ഐപിഎല്ലിൽ നിന്ന് ഒഴിവാക്കാൻ കൊൽക്കത്ത നൈറ്റ് റൈഡേഴ്സിന് ബിസിസിഐ നിർദ്ദേശം നൽകിയ നടപടിയെ രൂക്ഷമായി വിമർശിച്ച് ശശി തരൂർ എംപി. സ്പോർട്സിനെ അനാവശ്യമായി രാഷ്ട്രീയവൽക്കരിക്കുകയാണ് ബിസിസിഐ ചെയ്യുന്നതെന്ന് തരൂർ കുറ്റപ്പെടുത്തി.(What will be the approach towards a Bangladeshi Hindu cricketer? Shashi Tharoor MP to BCCI)
ബിസിസിഐ അംഗീകരിച്ച പട്ടികയിൽ നിന്നാണ് കൊൽക്കത്ത താരത്തെ തിരഞ്ഞെടുത്തത്. എന്നിട്ടിപ്പോൾ ഒഴിവാക്കാൻ പറയുന്നത് എന്ത് യുക്തിയാണെന്ന് അദ്ദേഹം ചോദിച്ചു. അതിർത്തി കടന്നുള്ള ഭീകരവാദം പ്രോത്സാഹിപ്പിക്കുന്ന പാകിസ്താനോട് കാണിക്കുന്ന സമീപനം ബംഗ്ലാദേശിനോട് കാണിക്കുന്നത് ശരിയല്ല. ഇരുരാജ്യങ്ങളുമായുള്ള ഇന്ത്യയുടെ നയതന്ത്ര ബന്ധം വ്യത്യസ്തമാണെന്നും അദ്ദേഹം ഓർമ്മിപ്പിച്ചു.
മുസ്തഫിസുർ ഒരിക്കലും ഇന്ത്യയ്ക്കെതിരെയോ ഹിന്ദു ന്യൂനപക്ഷങ്ങൾക്കെതിരെയോ സംസാരിച്ചിട്ടില്ല. മുസ്ലീം ബംഗ്ലാദേശികളോട് വിരോധവും ഹിന്ദു ബംഗ്ലാദേശികളോട് പ്രീണനവും കാണിക്കുന്ന അസഹിഷ്ണുതയുള്ള രാജ്യമാണോ ഇന്ത്യ എന്ന് അദ്ദേഹം ചോദിച്ചു. ലിട്ടൺ ദാസിനെയോ സൗമ്യ സർക്കാരിനെയോ പോലുള്ള ഹിന്ദു താരങ്ങളെയാണ് തിരഞ്ഞെടുത്തിരുന്നതെങ്കിൽ ബിസിസിഐ ഇതേ നിലപാട് സ്വീകരിക്കുമായിരുന്നോ എന്നും അദ്ദേഹം സംശയം പ്രകടിപ്പിച്ചു.
ബംഗ്ലാദേശിലെ രാഷ്ട്രീയ മാറ്റങ്ങളെത്തുടർന്ന് ഇന്ത്യക്കാർക്കെതിരെ ഉണ്ടായ ആക്രമണങ്ങളും സോഷ്യൽ മീഡിയയിലെ പ്രതിഷേധവും കണക്കിലെടുത്താണ് മുസ്തഫിസുറിനെ ഒഴിവാക്കാൻ ബിസിസിഐ നിർദ്ദേശം നൽകിയത്. ഇതിൽ പ്രതിഷേധിച്ച് ടി20 ലോകകപ്പിന് ടീമിനെ ഇന്ത്യയിലേക്ക് അയക്കില്ലെന്ന് ബംഗ്ലാദേശ് ക്രിക്കറ്റ് ബോർഡും സൂചിപ്പിച്ചിട്ടുണ്ട്.