കൊൽക്കത്ത: ലിയോണൽ മെസിയുടെ 'ഗോട്ട് (GOAT) ഇന്ത്യ പര്യടന'ത്തിനിടെ കൊൽക്കത്ത സോൾട്ട് ലേക്ക് സ്റ്റേഡിയത്തിലുണ്ടായ അനിഷ്ട സംഭവങ്ങളുടെ ഉത്തരവാദിത്തം ഏറ്റെടുത്ത് പശ്ചിമ ബംഗാൾ കായിക മന്ത്രി അരൂപ് ബിശ്വാസ് രാജിവെച്ചു. മുഖ്യമന്ത്രി മമത ബാനർജിയുടെ വിശ്വസ്തനായ അദ്ദേഹം, സംഭവത്തിൽ നിഷ്പക്ഷമായ അന്വേഷണം ഉറപ്പാക്കാനാണ് രാജിയെന്ന് വ്യക്തമാക്കി.
ഫുട്ബോൾ ഇതിഹാസത്തെ കാണാൻ പതിനായിരങ്ങളാണ് സോൾട്ട് ലേക്ക് സ്റ്റേഡിയത്തിലേക്ക് എത്തിയത്. 5,000 മുതൽ 25,000 രൂപ വരെയായിരുന്നു ടിക്കറ്റ് നിരക്ക്. എന്നാൽ ആരാധകരെ പ്രകോപിപ്പിച്ചത് താഴെ പറയുന്ന കാര്യങ്ങളാണ്.
മെസി ഗ്രൗണ്ടിലെത്തിയപ്പോൾ രാഷ്ട്രീയക്കാരും സംഘാടകരും സുരക്ഷാ ഉദ്യോഗസ്ഥരും അദ്ദേഹത്തിന് ചുറ്റും തിങ്ങിനിറഞ്ഞു. ഇതോടെ വൻ തുക നൽകി ടിക്കറ്റെടുത്തവർക്ക് താരത്തെ ഒന്ന് കാണാൻ പോലും സാധിച്ചില്ല.
ഷാരൂഖ് ഖാൻ, സൗരവ് ഗാംഗുലി, മുഖ്യമന്ത്രി മമത ബാനർജി എന്നിവർ മെസിക്കൊപ്പമുണ്ടാകുമെന്ന് സംഘാടകർ അറിയിച്ചിരുന്നെങ്കിലും ഇവരൊന്നും എത്തിയില്ല.
തുടർന്ന്, പ്രകോപിതരായ ആരാധകർ സ്റ്റേഡിയത്തിലെ സീറ്റുകളും താൽക്കാലിക പന്തലുകളും ബോർഡുകളും അടിച്ചുതകർത്തു. ഒടുവിൽ പോലീസ് ലാത്തിവീശിയാണ് ജനക്കൂട്ടത്തെ പിരിച്ചുവിട്ടത്. സംഭവത്തെത്തുടർന്ന് ബംഗാൾ ഡിജിപി, കായിക യുവജനക്ഷേമ വകുപ്പ് പ്രിൻസിപ്പൽ സെക്രട്ടറി എന്നിവർക്ക് സർക്കാർ കാരണം കാണിക്കൽ നോട്ടീസ് നൽകി. സർക്കാരിൻ്റെ ഭാഗത്തുനിന്ന് വൻ വീഴ്ചയുണ്ടായെന്നും സമഗ്രമായ അന്വേഷണം വേണമെന്നും ഗവർണർ സി.വി. ആനന്ദബോസ് ആവശ്യപ്പെട്ടു.
മെസി ആരാധകരെ വഞ്ചിച്ച സംഘാടകർക്കെതിരെ കടുത്ത നടപടി വേണമെന്ന ആവശ്യവുമായി പ്രതിപക്ഷവും രംഗത്തെത്തിയിട്ടുണ്ട്.