ന്യൂഡൽഹി: പ്രധാനമന്ത്രി നരേന്ദ്ര മോദിയുടെ അഞ്ച് വർഷത്തെ വിദേശരാജ്യ സന്ദർശനങ്ങളുടെ കണക്ക് പുറത്തുവിട്ട് കേന്ദ്രം. 2022 മെയ് മുതൽ 2024 ഡിസംബർ വരെ പ്രധാനമന്ത്രി നരേന്ദ്ര മോദി നടത്തിയ 38 വിദേശരാജ്യ സന്ദർശനങ്ങൾക്കായി ഏകദേശം 258 കോടി രൂപ ചെലവഴിച്ചതായി കേന്ദ്രം രാജ്യസഭയിൽ സമർപ്പിച്ച കണക്കുകൾ വ്യക്തമാക്കുന്നു. 2023 ജൂണിൽ പ്രധാനമന്ത്രി നടത്തിയ യുഎസ് സന്ദർശനമായിരുന്നു ഏറ്റവും ചെലവേറിയത്. 22 കോടിയിലധികം രൂപയാണ് ഇതിനുവേണ്ടി ചെലവഴിച്ചത്.
രാജ്യസഭയിൽ ഒരു ചോദ്യത്തിന് രേഖാമൂലമുള്ള മറുപടിയായാണ് വിദേശകാര്യ സഹമന്ത്രി പാബിത്ര മാർഗരിറ്റ കണക്ക് നൽകിയത്. കഴിഞ്ഞ മൂന്ന് വർഷത്തിനിടെ പ്രധാനമന്ത്രിയുടെ വിദേശ സന്ദർശനങ്ങൾക്കായി ഇന്ത്യൻ എംബസികൾ ചെലവഴിച്ച ആകെ തുക എത്രയെന്ന് പ്രതിപക്ഷ നേതാവ് മല്ലികാർജുൻ ഖാർഗെ സർക്കാരിനോട് ചോദിച്ചു. ഹോട്ടൽ ക്രമീകരണങ്ങൾ, കമ്മ്യൂണിറ്റി സ്വീകരണങ്ങൾ, ഗതാഗത ക്രമീകരണങ്ങൾ, മറ്റ് പല ചെലവുകൾ തുടങ്ങിയ പ്രധാന തലങ്ങളിലെ സന്ദർശനം തിരിച്ചുള്ള ചെലവുകളുടെ വിശദാംശങ്ങളും ഖാർഖെ ആവശ്യപ്പെട്ടു.
ഇതിനു മറുപടിയായി, "2022, 2023, 2024 വർഷങ്ങളിൽ പ്രധാനമന്ത്രി നടത്തിയ വിദേശ സന്ദർശനങ്ങൾക്കുള്ള രാജ്യാടിസ്ഥാനത്തിലുള്ള ചെലവുകളുടെ കണക്കുകൾ മറുപടിയിൽ പട്ടികപ്പെടുത്തിയ രൂപത്തിൽ അവതരിപ്പിച്ചു. ഔദ്യോഗിക, സുരക്ഷാ, മാധ്യമ പ്രതിനിധി സംഘങ്ങൾക്കുള്ള ചെലവ് ഉൾപ്പെടെയാണ് രേഖയിൽ കാണിച്ചിട്ടുള്ളത്. 2023 ജൂണിൽ പ്രധാനമന്ത്രിയുടെ യുഎസ് സന്ദർശനത്തിന് ₹22,89,68,509 ചെലവഴിച്ചു. അതേസമയം, 2024 സെപ്റ്റംബറിൽ അമേരിക്ക സന്ദർശിച്ചപ്പോൾ ₹15,33,76,348 രൂപയാണ് ചെലവഴിച്ചത്. 2023 മെയ് മാസത്തിലെ പ്രധാനമന്ത്രിയുടെ ജപ്പാൻ സന്ദർശനത്തിന് ₹17,19,33,356 ഉം നേപ്പാൾ സന്ദർശനത്തിന് ₹80,01,483 ഉം ചെലവഴിച്ചു.
2022-ൽ പ്രധാനമന്ത്രി സന്ദർശിച്ച വിദേശ രാജ്യങ്ങളിൽ ഡെന്മാർക്ക്, ഫ്രാൻസ്, യുഎഇ, ഉസ്ബെക്കിസ്ഥാൻ, ഇന്തോനേഷ്യ എന്നിവയും ഉൾപ്പെടുന്നു. 2023-ൽ പ്രധാനമന്ത്രി സന്ദർശിച്ച മറ്റ് വിദേശ രാജ്യങ്ങളിൽ ഓസ്‌ട്രേലിയ, ഈജിപ്ത്, ദക്ഷിണാഫ്രിക്ക, ഗ്രീസ് എന്നിവ ഉൾപ്പെടുന്നു. 2024-ൽ പ്രധാനമന്ത്രി സന്ദർശിച്ച വിദേശ രാജ്യങ്ങളിൽ പോളണ്ട് (ഇതിന് ₹10,10,18,686 ചിലവായി), ഉക്രെയ്ൻ (₹2,52,01,169), റഷ്യ (₹5,34,71,726), ഇറ്റലി (₹14,36,55,289), ബ്രസീൽ (₹5,51,86,592), ഗയാന (₹5,45,91,495) എന്നിവ ഉൾപ്പെടുന്നു. ഈ 38 വിദേശ സന്ദർശനങ്ങൾക്കായി ആകെ ചെലവഴിച്ചത് ഏകദേശം 258 കോടി രൂപയാണ്."
2014 ന് മുമ്പുള്ള വർഷങ്ങളിലെ ചില അനുബന്ധ ഡാറ്റയും വിദേശകാര്യ മന്ത്രി മറുപടിയിൽ പങ്കുവെച്ചു. 'പ്രധാനമന്ത്രിയുടെ വിദേശ സന്ദർശനങ്ങൾക്കായി നേരത്തെ ചെലവഴിച്ചത് ₹10,74,27,363 (യുഎസ്എ, 2011), ₹9,95,76,890 (റഷ്യ, 2013), ₹8,33,49,463 (ഫ്രാൻസ്, 2011) ₹6,02,23,484 (ജർമ്മനി, 2013) എന്നിവയായിരുന്നു."- അദ്ദേഹം പറഞ്ഞു.