ന്യൂഡൽഹി: മനുഷ്യക്കടത്തും തട്ടിക്കൊണ്ടുപോകൽ കേസുകളും വർധിച്ച പശ്ചാത്തലത്തിൽ ഇന്ത്യക്കാർക്കുള്ള വിസ രഹിത പ്രവേശനം ഇറാൻ അവസാനിപ്പിച്ചു. ക്രിമിനൽ പ്രവർത്തനങ്ങൾ വർധിക്കുന്നതായി ശ്രദ്ധയിൽപ്പെട്ടതിനെ തുടർന്നാണ് ഗവൺമെന്റ് ഓഫ് ഇസ്ലാമിക് റിപ്പബ്ലിക് ഓഫ് ഇറാൻ ഈ സുപ്രധാന തീരുമാനം കൈക്കൊണ്ടത്.(Visas now mandatory for Indians, Iran ends visa exemption)
ഈ മാസം 22 മുതൽ ആണ് പുതിയ തീരുമാനം പ്രാബല്യത്തിൽ വരുന്നത്. സാധാരണ പാസ്‌പോർട്ടുള്ള ഇന്ത്യൻ പൗരന്മാർക്ക് അനുവദിച്ചിരുന്ന വിസ ഇളവാണ് ഇതോടെ നിർത്തലാകുന്നത്. നവംബർ 22-ന് ശേഷം ഇറാനിൽ പ്രവേശിക്കുന്നതിനും ഇറാൻ വഴിയുള്ള ട്രാൻസിറ്റ് യാത്രകൾക്കും സാധാരണ പാസ്‌പോർട്ടുള്ള എല്ലാ ഇന്ത്യൻ യാത്രക്കാരും ഇനിമുതൽ മുൻകൂട്ടി വിസ എടുക്കണം.
വിദേശകാര്യ മന്ത്രാലയത്തിന്റെ നിർദ്ദേശങ്ങൾ കർശനമായി പാലിച്ചുകൊണ്ട് മാത്രമേ ഇന്ത്യക്കാർ ഇറാനിലേക്ക് യാത്ര ചെയ്യാവൂ എന്നും അധികൃതർ മുന്നറിയിപ്പ് നൽകി. ഇറാനിലേക്കുള്ള യാത്രാ പ്ലാനുകൾ ചെയ്യുന്നവർ ഉടൻ തന്നെ പുതിയ വിസാ നിയമങ്ങൾ പാലിക്കാനുള്ള നടപടികൾ സ്വീകരിക്കണം.