ന്യൂഡൽഹി: കടുത്ത മഞ്ഞുവീഴ്ചയിൽ കാഴ്ചാപരിധി പൂജ്യമായതോടെ കാറിന്റെ ബോണറ്റിലിരുന്ന് ഡ്രൈവർക്ക് വഴികാട്ടുന്ന യുവാവിന്റെ വീഡിയോ സോഷ്യൽ മീഡിയയിൽ വൈറലാകുന്നു (Human Indicator). ഉത്തരേന്ത്യയിൽ നിന്നുള്ളതാണ് ഈ ദൃശ്യങ്ങൾ. ഹെഡ്ലൈറ്റുകൾ പോലും ഫലിക്കാത്ത വിധം മൂടൽമഞ്ഞ് ശക്തമായതോടെയാണ് സുഹൃത്തിനെ കാറിന് പുറത്ത് ഇരുത്തി ഡ്രൈവർ വാഹനം ഓടിച്ചത്. ഇതിനെ 'അഡ്വാൻസ്ഡ് ഡ്രൈവിംഗ് ടെക്നോളജി' (ADAS Level 4) എന്ന് തമാശയായി വീഡിയോയിൽ വിശേഷിപ്പിക്കുന്നുണ്ടെങ്കിലും സംഗതി അതീവ അപകടകരമാണെന്ന് പോലീസ് മുന്നറിയിപ്പ് നൽകി.
രാത്രികാലത്ത് റോഡ് കാണാൻ സാധിക്കാതെ വന്നതോടെയാണ് ഈ 'ബുദ്ധി' ഇവർ പ്രയോഗിച്ചത്. കാറിനുള്ളിലിരിക്കുന്നവർ തമാശയായിട്ടാണ് ഇതിനെ കാണുന്നതെങ്കിലും, ചെറിയൊരു അശ്രദ്ധ പോലും ബോണറ്റിലിരിക്കുന്ന ആളിന്റെ ജീവൻ അപകടത്തിലാക്കാം. മൂടൽമഞ്ഞിൽ മുന്നിൽ വരുന്ന മറ്റ് വാഹനങ്ങൾ ഈ യുവാവിനെ കാണാൻ സാധ്യതയില്ല എന്നതും അപകടസാധ്യത വർദ്ധിപ്പിക്കുന്നു. 11 മില്യണിലധികം ആളുകളാണ് ഈ വീഡിയോ ഇതിനോടകം കണ്ടത്.
ഓടിക്കൊണ്ടിരിക്കുന്ന വാഹനത്തിന്റെ ബോണറ്റിലിരിക്കുന്നത് ഇന്ത്യൻ മോട്ടോർ വാഹന നിയമപ്രകാരം ക്രിമിനൽ കുറ്റമാണ്. സമാനമായ രീതിയിൽ റീൽസ് ചിത്രീകരിച്ചവർക്കെതിരെ മുൻപ് പോലീസ് കടുത്ത നടപടികൾ എടുത്തിട്ടുണ്ട്. നോയിഡയിൽ ഇത്തരത്തിൽ അഭ്യാസപ്രകടനം നടത്തിയ ഒരാൾക്ക് 28,500 രൂപയും ഡൽഹിയിൽ 'സ്പൈഡർമാൻ' വേഷമിട്ട് ബോണറ്റിലിരുന്ന യുവാവിന് 26,000 രൂപയും പിഴ ചുമത്തിയിരുന്നു. ലൈസൻസ് റദ്ദാക്കുന്നതിനോ അറസ്റ്റ് ചെയ്യുന്നതിനോ വരെ ഇത്തരം പ്രവൃത്തികൾ കാരണമാകും.
A viral video from North India shows a man sitting on a moving car's bonnet to guide the driver through dense fog with zero visibility. While the group jokingly called it a "human indicator," social media users and authorities have slammed the act as reckless and illegal. Under Indian motor vehicle laws, such dangerous stunts can lead to heavy fines exceeding ₹25,000, license suspension, or arrest, as seen in similar cases in Noida and Delhi.