ന്യൂഡൽഹി: കോടതി പരിസരത്ത് അഭിഭാഷകരുടെ പ്രൊഫഷണൽ മര്യാദയെക്കുറിച്ചും സ്ത്രീകളുടെ സുരക്ഷയെക്കുറിച്ചും ഗുരുതരമായ ചോദ്യങ്ങൾ ഉയർത്തിക്കൊണ്ട് ഡൽഹി ഹൈക്കോടതിയുമായി ബന്ധപ്പെട്ട ഒരു സിസിടിവി ദൃശ്യം സോഷ്യൽ മീഡിയയിൽ വൈറലാകുന്നു. കോടതി നടപടികൾ ആരംഭിക്കുന്നതിന് തൊട്ടുമുമ്പ്, ഒരു അഭിഭാഷകൻ തന്റെ ചേംബറിൽ വെച്ച് തന്നെ കാണാനെത്തിയ സ്ത്രീയെ ബലം പ്രയോഗിച്ച് ചുംബിക്കുന്നതിന്റെ വീഡിയോയാണ് വ്യാപകമായി പ്രചരിക്കുന്നത്.
അഭിഭാഷകന്റെ മുറിയിലെയും ഹൈക്കോടതിയിലെയും ദൃശ്യങ്ങൾ ഒരു ലാപ്ടോപ്പിൽ പ്രദർശിപ്പിക്കുന്നതിന്റെ വീഡിയോയാണ് സമൂഹ മാധ്യമങ്ങളിൽ പ്രചരിക്കുന്നത്. കോടതി ഹാളിൽ അഭിഭാഷകർ എത്തുന്നതിന്റെ ദൃശ്യങ്ങൾ ഒരുവശത്ത് കാണിക്കുമ്പോൾ, മറുവശത്തെ ചേംബറിൽ നടക്കുന്ന സംഭവങ്ങളാണ് വീഡിയോയുടെ ഉള്ളടക്കം.
ചേംബറിൽ നടന്നത്
ചേംബറിൽ അഭിഭാഷകനെ കാണാനെത്തിയ സ്ത്രീയെയാണ് ദൃശ്യങ്ങളിൽ കാണുന്നത്. സംഭാഷണത്തിനിടെ, അഭിഭാഷകൻ സ്ത്രീയുടെ കൈയിൽ പിടിച്ച് വലിച്ചു തന്റെ അടുത്തേക്ക് അടുപ്പിക്കാൻ ശ്രമിക്കുന്നു. സ്ത്രീ ഒഴിയാൻ ശ്രമിക്കുന്നുണ്ടെങ്കിലും, അഭിഭാഷകൻ കൂടുതൽ ശക്തിയായി അവരെ വലിച്ച് ചുംബിക്കുന്നതും വീഡിയോയിൽ വ്യക്തമാണ്.
ഈ ദൃശ്യങ്ങൾ അഭിഭാഷക സമൂഹത്തിനിടയിലെ പ്രൊഫഷണൽ പെരുമാറ്റത്തെക്കുറിച്ച് വലിയ ആശങ്കകളാണ് ഉയർത്തുന്നത്. "കോടതി മുറിക്കുള്ളിൽ പോലും സ്ത്രീകൾ സുരക്ഷിതരല്ലേ?" എന്ന ചോദ്യമാണ് നെറ്റിസൺസ് പ്രധാനമായും ഉന്നയിക്കുന്നത്.
സാമൂഹ്യ മാധ്യമങ്ങളിൽ കോളിളക്കം
@ShoneeKapoor എന്ന എക്‌സ് (X) അക്കൗണ്ടാണ് "ഡിജിറ്റൽ ഇന്ത്യയിലെ നീതിപീഠത്തിലേക്ക് സ്വാഗതം" എന്ന വിമർശനപരമായ കുറിപ്പോടെ ഈ വീഡിയോ പങ്കുവെച്ചത്. ഈ ദൃശ്യങ്ങൾ അതിവേഗം വൈറലാവുകയും ഒറ്റ ദിവസം കൊണ്ട് 26 ലക്ഷത്തിലധികം ആളുകൾ കണ്ടതായും റിപ്പോർട്ടുണ്ട്.
സംഭവത്തിൽ ഉൾപ്പെട്ട അഭിഭാഷകൻ ആരാണെന്ന് ഇതുവരെ വ്യക്തമായിട്ടില്ല. ചിലർ ഇത് AI നിർമ്മിത ദൃശ്യങ്ങളാകാൻ സാധ്യതയുണ്ടെന്ന സംശയവും പ്രകടിപ്പിച്ചു രംഗത്തെത്തിയിട്ടുണ്ട്. എങ്കിലും, നീതിന്യായ വ്യവസ്ഥയുടെ പരിപാവനമായ സ്ഥലത്ത് നടന്നുവെന്ന് ആരോപിക്കപ്പെടുന്ന ഈ സംഭവം വലിയ കോളിളക്കമുണ്ടാക്കിയിരിക്കുകയാണ്.