മുംബൈ: എൺപതുകളിലെ പ്രശസ്ത ബാലതാരമായിരുന്ന ബേബി ഗുഡുവിന്റെ പിതാവും മുതിർന്ന ബോളിവുഡ് സംവിധായകനുമായ എം.എം. ബെയ്ഗിനെ (76) മുംബൈയിലെ വസതിയിൽ മരിച്ച നിലയിൽ കണ്ടെത്തി (Veteran Filmmaker MM Baig Found Dead). അന്ധേരി വെസ്റ്റിലെ ലോഖണ്ഡ്വാല കോംപ്ലക്സിലുള്ള വസതിയിൽ തനിച്ചായിരുന്നു താമസം. കുറച്ചുദിവസമായി വീടിന് പുറത്തുകാണാത്തതിനെത്തുടർന്ന് അയൽവാസികൾ പോലീസിൽ വിവരമറിയിക്കുകയായിരുന്നു.
വീട്ടിൽ നിന്ന് ദുർഗന്ധം വമിച്ചതോടെ പരിഭ്രാന്തരായ അയൽവാസികൾ പോലീസിനെ വിവരമറിയിക്കുകയായിരുന്നു. പോലീസ് എത്തി വാതിൽ തകർത്ത് അകത്തുകയറിയപ്പോഴാണ് മൃതദേഹം കണ്ടെത്തിയത്. മൃതദേഹത്തിന് നാലോ അഞ്ചോ ദിവസത്തെ പഴക്കമുണ്ടായിരുന്നുവെന്ന് പോലീസ് അറിയിച്ചു. ഏറെക്കാലമായി അസുഖബാധിതനായിരുന്ന അദ്ദേഹം തനിച്ചായിരുന്നു താമസം. മൃതദേഹം പോസ്റ്റ്മോർട്ടത്തിനായി കൂപ്പർ ആശുപത്രിയിലേക്ക് മാറ്റി. ദുബായിലായിരുന്ന മകളെ വിവരമറിയിച്ചിട്ടുണ്ട്.
ബോളിവുഡിലെ ശ്രദ്ധേയനായ ടെക്നീഷ്യനായിരുന്ന ബെയ്ഗ്, രാകേഷ് റോഷൻ, ജെ. ഓം പ്രകാശ് തുടങ്ങിയ പ്രമുഖർക്കൊപ്പം സഹസംവിധായകനായി പ്രവർത്തിച്ചിട്ടുണ്ട്. ശിൽപ ശിരോദ്കർ അഭിനയിച്ച ‘ചോട്ടി ബഹു’ ഉൾപ്പെടെയുള്ള ചിത്രങ്ങൾ അദ്ദേഹം സംവിധാനം ചെയ്തു. സൂപ്പർ താരം ഹൃത്വിക് റോഷന്റെ അരങ്ങേറ്റത്തിന് മുൻപ് അദ്ദേഹത്തിന് സംഭാഷണ പരിശീലനം നൽകിയത് ബെയ്ഗ് ആയിരുന്നു. ഷാഹിന്ദ ബെയ്ഗ് എന്ന ബേബി ഗുഡു എൺപതുകളിലെ ഏറ്റവും തിരക്കുള്ള ബാലതാരമായിരുന്നു.
