ന്യൂഡൽഹി: പുതുതായി നിലവിൽ വന്ന വിബിജി റാം ജി നിയമത്തെക്കുറിച്ച് ജനങ്ങളിൽ അവബോധം വളർത്തുന്നതിനായി ഈ മാസം 26-ന് മുമ്പ് പ്രത്യേക ഗ്രാമസഭകൾ വിളിച്ചുചേർക്കാൻ കേന്ദ്ര സർക്കാർ സംസ്ഥാനങ്ങൾക്ക് നിർദേശം നൽകി. കേന്ദ്ര ഗ്രാമവികസന സെക്രട്ടറി ഇത് സംബന്ധിച്ച് സംസ്ഥാന ചീഫ് സെക്രട്ടറിമാർക്ക് കത്തയച്ചു.(VBG RAM-G act, Central government orders special Gram Sabhas to be convened by 26th)
തൊഴിലാളികൾ, സ്ത്രീകൾ, പട്ടികജാതി-പട്ടികവർഗ വിഭാഗങ്ങൾ, മറ്റ് ദുർബല വിഭാഗങ്ങൾ എന്നിവരുടെ സജീവ പങ്കാളിത്തം ഗ്രാമസഭകളിൽ ഉറപ്പാക്കണം. 'പഞ്ചായത്ത് നിർണ്ണയ്' ആപ്പ് വഴി ഗ്രാമസഭയുടെ വിവരങ്ങൾ തത്സമയം അപ്ലോഡ് ചെയ്യണം. ടൈംസ്റ്റാമ്പ് ചെയ്തതും ജിയോടാഗ് ചെയ്തതുമായ ഫോട്ടോകളും വീഡിയോകളും ഇതിനോടൊപ്പം നൽകണം.
ഫീൽഡ് ലെവൽ ഉദ്യോഗസ്ഥർക്കും പഞ്ചായത്തീരാജ് സ്ഥാപനങ്ങൾക്കും ആവശ്യമായ മാർഗനിർദേശങ്ങൾ നൽകാൻ സംസ്ഥാനങ്ങളോട് ആവശ്യപ്പെട്ടു. മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിക്ക് (MGNREGS) പകരമായാണ് കേന്ദ്ര സർക്കാർ പുതിയ നിയമം കൊണ്ടുവന്നത്. പാർലമെന്റ് പാസാക്കിയ ബില്ലിന് രാഷ്ട്രപതി അംഗീകാരം നൽകിയതോടെ ഇത് നിയമമായി മാറി.
മഹാത്മാഗാന്ധിയുടെ പേര് ഒഴിവാക്കിയതിലും പഴയ പദ്ധതി നിർത്തലാക്കിയതിലും പ്രതിഷേധിച്ച് പ്രതിപക്ഷം പാർലമെന്റിൽ നിന്ന് ഇറങ്ങിപ്പോയിരുന്നു. പ്രതിപക്ഷത്തിന്റെ ശക്തമായ എതിർപ്പിനിടെ ശബ്ദവോട്ടോടെയാണ് രാജ്യസഭയിൽ ബില്ല് പാസാക്കിയത്.