ന്യൂഡൽഹി: രാജ്യത്ത് ഇൻഡിഗോയുടെ വിമാന സർവീസുകൾ താറുമാറായി. കഴിഞ്ഞ ദിവസങ്ങളിലായി വിവിധ വിമാനത്താവളങ്ങളിൽ നിന്നുള്ള നൂറിലധികം വിമാനങ്ങളാണ് ഇൻഡിഗോ റദ്ദാക്കിയത്. കൂടാതെ നിരവധി സർവീസുകൾ മണിക്കൂറുകളോളം വൈകുകയും ചെയ്തു. ജീവനക്കാരുടെ കുറവ് ഉൾപ്പെടെ വിവിധ കാരണങ്ങളാണ് പ്രവർത്തന തടസ്സത്തിന് കാരണമെന്നാണ് പ്രാഥമിക വിവരം.(Various reasons behind disruption of IndiGo flight services in the country)
പ്രതിസന്ധി രൂക്ഷമായതോടെ, സംഭവത്തിൽ കേന്ദ്ര ഏജൻസിയായ ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡി.ജി.സി.എ.) അന്വേഷണം ആരംഭിച്ചു. നിലവിലെ പ്രതിസന്ധിക്കുള്ള കാരണങ്ങൾ, വിമാനങ്ങൾ റദ്ദാക്കുന്നതിനും വൈകുന്നതിനും ഇടയാക്കിയ സാഹചര്യം, പ്രതിസന്ധി ലഘൂകരിക്കുന്നതിനുള്ള പദ്ധതികൾ എന്നിവ വിശദീകരിക്കാൻ ഡി.ജി.സി.എ. ഇൻഡിഗോയ്ക്ക് നിർദേശം നൽകിയിട്ടുണ്ട്.
പ്രതിദിനം ഏകദേശം 2,300 ആഭ്യന്തര, അന്തർദേശീയ വിമാന സർവീസുകൾ നടത്തുന്ന ഇൻഡിഗോയുടെ പ്രവർത്തനം തടസ്സപ്പെട്ടതോടെ നൂറുകണക്കിന് യാത്രക്കാർ വലഞ്ഞു. ഡൽഹി, മുംബൈ, ബെംഗളൂരു, ഹൈദരാബാദ് ഉൾപ്പെടെയുള്ള പ്രധാന വിമാനത്താവളങ്ങളിലായാണ് സ്ഥിതി രൂക്ഷമായത്. കഴിഞ്ഞ രണ്ട് ദിവസങ്ങളിലായി കമ്പനി വലിയ പ്രതിസന്ധി നേരിടുന്നുവെന്നും, യാത്രക്കാർക്കുണ്ടായ അസൗകര്യത്തിൽ ക്ഷമ ചോദിക്കുന്നതായും ഇൻഡിഗോ അറിയിച്ചു.
ഷെഡ്യൂൾ മാറ്റം, സാങ്കേതിക തകരാർ, പ്രതികൂല കാലാവസ്ഥ, യാത്രക്കാരുടെ തിരക്ക്, ക്രൂ റോസ്റ്ററിങ് നിയമം പുതുക്കിയത് തുടങ്ങി അപ്രതീക്ഷിതമായ പല കാരണങ്ങളും പ്രതിസന്ധിക്ക് കാരണമായെന്ന് ഇൻഡിഗോ വക്താവ് വിശദീകരിച്ചു.
വിവിധ വിമാനത്താവളങ്ങളിൽ ഇൻഡിഗോയുടെ റദ്ദാക്കിയ വിമാനങ്ങളുടെ ഏകദേശ കണക്ക് ഇങ്ങനെയാണ്:
ബെംഗളൂരു: 42 വിമാനങ്ങൾ
ഡൽഹി: 38 വിമാനങ്ങൾ
മുംബൈ: 33 വിമാനങ്ങൾ
ഹൈദരാബാദ്: 19 വിമാനങ്ങൾ
സർവീസുകൾ ഉടൻ സാധാരണ നിലയിലാക്കുന്നതിനും യാത്രക്കാരുടെ ബുദ്ധിമുട്ട് കുറയ്ക്കാനുമുള്ള ശ്രമം കമ്പനി ഊർജ്ജിതമാക്കിയിട്ടുണ്ട്.