ന്യൂഡൽഹി: യുഎസ് സ്റ്റേറ്റ് ഡിപ്പാർട്ട്മെന്റിന്റെ പുതിയ സാമൂഹിക മാധ്യമ പരിശോധനാ നയം പ്രാബല്യത്തിൽ വരുന്നതോടെ ഇന്ത്യയിലെ നിരവധി എച്ച്-1ബി വിസ അപേക്ഷകരുടെ അഭിമുഖങ്ങൾ നീട്ടിവെച്ചു. പുതിയ നിയമങ്ങൾ പ്രാബല്യത്തിൽ വരുന്ന സാഹചര്യത്തിൽ പുനഃക്രമീകരിച്ച തീയതികളിൽ മാത്രമേ ഹാജരാകാവൂ എന്ന് ഇന്ത്യയിലെ യുഎസ് എംബസി മുന്നറിയിപ്പ് നൽകി. ആദ്യം ലഭിച്ച തീയതിയിൽ വന്നാൽ പ്രവേശനം നിഷേധിക്കുമെന്നും എംബസി വ്യക്തമാക്കി.(US social media verification policy, Setback for Indian H-1B visa applicants)
ഹൈദരാബാദ്, ചെന്നൈ കോൺസുലേറ്റുകൾ ഉൾപ്പെടെ നിരവധി സ്ഥലങ്ങളിൽ അപ്പോയിന്റ്മെന്റുകൾ റദ്ദാക്കിയിട്ടുണ്ട്. പല അപേക്ഷകരുടെയും ഡിസംബർ മാസത്തെ സ്ലോട്ടുകൾ 2026 മാർച്ച് വരെയാണ് നീട്ടിയിരിക്കുന്നത്. ഡിസംബർ പകുതി മുതൽ അവസാനം വരെയുള്ള അഭിമുഖങ്ങളാണ് അടുത്ത വർഷം മാർച്ച് വരെ മാറ്റിവെക്കുകയാണെന്ന് റിപ്പോർട്ട് ചെയ്യുന്നു. എത്ര വിസ അപ്പോയിന്റ്മെന്റുകളാണ് പുനഃക്രമീകരിച്ചിട്ടുള്ളത് എന്നതിൽ വ്യക്തതയില്ല.
തൊഴിൽ വിസയായ എച്ച്1ബിക്ക് അപേക്ഷിക്കുന്നവരും അവരുടെ ആശ്രിതർക്കുള്ള എച്ച്4 വിസയ്ക്ക് അപേക്ഷിക്കുന്നവരുമാണ് പുതിയ നയത്തിന്റെ പരിധിയിൽ വരുന്നത്. ഡിസംബർ 15 മുതൽ പ്രാബല്യത്തിൽ വരുന്ന നിയമമനുസരിച്ച്, വിസ അപേക്ഷകർ അവരുടെ സാമൂഹിക മാധ്യമ അക്കൗണ്ടുകൾ ആർക്കും കാണാവുന്ന വിധത്തിൽ പരസ്യമാക്കണം. ഇന്ത്യക്കാർ ഉൾപ്പെടെയുള്ള ഹൈ-സ്കിൽഡ് വിസ ഉടമകൾക്കിടയിൽ ഈ നയം വലിയ ഉത്കണ്ഠ സൃഷ്ടിച്ചിട്ടുണ്ട്.
സാധാരണ സംഭാഷണങ്ങൾ, രാഷ്ട്രീയ അഭിപ്രായങ്ങൾ, അല്ലെങ്കിൽ റെസ്യൂമെയിലെ തെറ്റായ വിശദാംശങ്ങൾ പോലും പുതിയ നിയമപ്രകാരം കൂടുതൽ പരിശോധനയ്ക്ക് കാരണമായേക്കാം. കൂടുതൽ ഇന്ത്യൻ തൊഴിലാളികളുള്ള ടെക് കമ്പനികൾ ജീവനക്കാർക്ക് ചില നിർദ്ദേശങ്ങൾ നൽകിയിട്ടുണ്ട്. സാമൂഹിക മാധ്യമ പ്രൊഫൈലുകൾ ഓഡിറ്റ് ചെയ്യുക. രാഷ്ട്രീയപരമായ 'മീമുകൾ' (Memes) പങ്കുവെക്കുന്നത് ഒഴിവാക്കുക. വിസ അപേക്ഷകളിൽ പ്രൊഫഷണൽ ഇമെയിലുകൾ ഉപയോഗിക്കുക.
വിദ്യാർഥികൾ, രാജ്യങ്ങൾ തമ്മിലുള്ള സാംസ്കാരിക-വിദ്യാഭ്യാസ വിനിമയത്തിന്റെ ഭാഗമായി യുഎസിലെത്തുന്നവർ എന്നിവരുടെ സാമൂഹിക മാധ്യമ അക്കൗണ്ടുകളുടെ അവലോകനം മുൻപേ നിർബന്ധമാക്കിയിരുന്നു. ഈ നിയമമാണ് ഇപ്പോൾ എച്ച്1ബി, എച്ച്4 വിസകൾക്കു കൂടി ബാധകമാക്കിയത്.