ഫത്തേപൂർ: ഉത്തർപ്രദേശിലെ ഫത്തേപൂരിൽ മറ്റൊരു മതസ്ഥനായ യുവാവുമായുള്ള പ്രണയത്തെത്തുടർന്ന് പത്തൊൻപതുകാരിയെ മാതാവും സഹോദരനും ചേർന്ന് വിഷം നൽകി കൊലപ്പെടുത്തി (UP Woman Poisons Daughter). ഫർസാന എന്ന യുവതിയാണ് കൊല്ലപ്പെട്ടത്. കൊലപാതകത്തിന് ശേഷം കുറ്റം കാമുകന്റെ മേൽ കെട്ടിവെക്കാനാണ് കുടുംബം ശ്രമിച്ചതെങ്കിലും പോലീസ് അന്വേഷണത്തിൽ സത്യം പുറത്തുവരികയായിരുന്നു.
കഴിഞ്ഞ ഒക്ടോബറിൽ സോഷ്യൽ മീഡിയ വഴിയാണ് ഫർസാന സുനിൽ യാദവ് എന്ന യുവാവുമായി പരിചയപ്പെടുന്നത്. വിവാഹ വാഗ്ദാനം നൽകി സുനിൽ ഫർസാനയുമായി അടുപ്പത്തിലായി. ഇതിനിടെ ഫർസാന ഗർഭിണിയാവുകയും സുനിൽ നിർബന്ധിച്ച് ഗർഭച്ഛിദ്രം നടത്തുകയും ചെയ്തു. ഗർഭച്ഛിദ്രത്തിന് പിന്നാലെ ഫർസാനയുടെ ആരോഗ്യനില വഷളായതോടെയാണ് വീട്ടുകാർ വിവരമറിയുന്നത്. ഇതോടെ മാതാവും സഹോദരനും ചേർന്ന് ഫർസാനയെ വീട്ടിൽ നിന്ന് പുറത്താക്കി.
ഫെബ്രുവരി 26-ന് ഫത്തേപൂർ റെയിൽവേ സ്റ്റേഷനിൽ അബോധാവസ്ഥയിൽ കണ്ടെത്തിയ ഫർസാനയെ പോലീസ് ആശുപത്രിയിൽ പ്രവേശിപ്പിച്ചു. തന്നെ വഞ്ചിച്ച സുനിലിനെതിരെ ഫർസാന പോലീസിൽ പരാതി നൽകിയിരുന്നു. എന്നാൽ, കുടുംബം ഇടപെട്ട് പോലീസിനോട് തുടർനടപടികൾ വേണ്ടെന്ന് അഭ്യർത്ഥിച്ച് ഫർസാനയെ വീട്ടിലേക്ക് കൂട്ടിക്കൊണ്ടുപോയി.
മാർച്ച് ഒന്നിന് രാത്രി ഫർസാനയെ പാടത്തേക്ക് കൊണ്ടുപോയി മാതാവ് അഫ്സാനയും (48) സഹോദരൻ അഫ്സറും (26) ചേർന്ന് ബലമായി വിഷം കുടിപ്പിക്കുകയായിരുന്നു. മകൾ മരിച്ചുവെന്ന് ഉറപ്പാക്കിയ ശേഷം, സുനിൽ നൽകിയ വിഷം കഴിച്ചാണ് ഫർസാന മരിച്ചതെന്ന് കാണിച്ച് അഫ്സാന പോലീസിൽ പരാതി നൽകി.
പോലീസ് നടത്തിയ ഫോൺ രേഖകളുടെ പരിശോധനയിലും ശാസ്ത്രീയ അന്വേഷണത്തിലുമാണ് കുടുംബത്തിന്റെ മൊഴിയിലെ വൈരുദ്ധ്യം പുറത്തുവന്നത്. തുടർന്ന് നടത്തിയ ചോദ്യം ചെയ്യലിൽ പ്രതികൾ കുറ്റം സമ്മതിച്ചു. അന്യമതസ്ഥനുമായുള്ള ബന്ധം ഗ്രാമത്തിൽ അപമാനമുണ്ടാക്കുമെന്ന ഭയമാണ് കൊലപാതകത്തിന് പ്രേരിപ്പിച്ചതെന്ന് ഇവർ പോലീസിനോട് പറഞ്ഞു. പ്രതികളെ പോലീസ് അറസ്റ്റ് ചെയ്തു. സുനിലിനെതിരെയുള്ള പഴയ പരാതിയിൽ നിയമപരമായ തുടർനടപടികൾ സ്വീകരിക്കുമെന്നും പോലീസ് അറിയിച്ചു.
Summary: In a shocking case of alleged honor killing in Uttar Pradesh’s Fatehpur, a 19-year-old girl named Farzana was poisoned to death by her mother and brother. The family initially tried to frame her boyfriend, Sunil Yadav, claiming he gave her the poison.
