ന്യൂഡൽഹി: അധോലോക കുറ്റവാളി ലോറൻസ് ബിഷ്ണോയിയുടെ ഇളയ സഹോദരനും മഹാരാഷ്ട്ര മുൻ മന്ത്രി ബാബ സിദ്ദീഖി വധക്കേസിലെ മുഖ്യപ്രതിയുമായ അൻമോൽ ബിഷ്ണോയിയെ യുഎസിൽനിന്ന് ഇന്ത്യയിലെത്തിച്ചു. ഡൽഹിയിലെ ഇന്ദിരാ ഗാന്ധി രാജ്യാന്തര വിമാനത്താവളത്തിൽ എത്തിയ ഉടൻ എൻ.ഐ.എ. ഇയാളുടെ അറസ്റ്റ് രേഖപ്പെടുത്തി.(Underworld criminal Anmol Bishnoi extradited from US to India)
2022 മുതൽ ഒളിവിലായിരുന്ന അൻമോലിന്റെ ആദ്യ ചിത്രം എൻ.ഐ.എ. പുറത്തുവിട്ടു. ഇയാളെ ഉടൻതന്നെ കോടതിയിൽ ഹാജരാക്കും. ബാബാ സിദ്ദീഖിയുടേത് ഉൾപ്പെടെ നിരവധി ക്രിമിനൽ കേസുകളിൽ അൻമോൽ പ്രതിയാണ്.
നടൻ സൽമാൻ ഖാനുമായി അടുത്ത സൗഹൃദമുണ്ടായിരുന്ന ബാബാ സിദ്ദീഖി 2024 ഒക്ടോബർ 12-നാണ് വെടിയേറ്റു മരിച്ചത്. പ്രത്യേക പോലീസ് സുരക്ഷയുണ്ടായിരുന്ന അദ്ദേഹത്തെ, ബാന്ദ്രയിലെ മകൻ്റെ ഓഫീസിനു മുന്നിൽ കാറിൽ കയറുന്നതിനിടെ മൂന്നു പേരുടെ സംഘമാണ് വെടിവെച്ചത്.
2022 മേയിൽ നടന്ന പഞ്ചാബി ഗായകൻ സിദ്ദു മൂസവാലയുടെ കൊലക്കേസിലും ഇയാൾ പ്രതിയാണ്. ഈ വർഷം ഏപ്രിൽ 14-ന് ബോളിവുഡ് താരം സൽമാൻ ഖാൻ്റെ മുംബൈ ബാന്ദ്രയിലെ വീടിനു പുറത്ത് വെടിയുതിർത്ത സംഭവത്തിനു പിന്നിലും ഇയാളാണെന്ന് സംശയിക്കുന്നു. അൻമോലിനെ കണ്ടെത്തുന്നവർക്ക് എൻ.ഐ.എ. 10 ലക്ഷം രൂപ പ്രതിഫലം പ്രഖ്യാപിച്ചിരുന്നു.
പഞ്ചാബിലെ ഫാസിൽക്ക ജില്ലാ സ്വദേശിയായ അൻമോൽ, വ്യാജ പാസ്‌പോർട്ട് ഉപയോഗിച്ചാണ് ഇന്ത്യയിൽനിന്ന് വിദേശത്തേക്കു കടന്നത്. ദുബായ്, കെനിയ വഴി നേപ്പാൾ കടന്നാണ് ഒടുവിൽ യുഎസിലെത്തിയതെന്ന് അന്വേഷണ ഉദ്യോഗസ്ഥർ കണ്ടെത്തി. കഴിഞ്ഞ വർഷം നവംബറിൽ ഇയാൾ യുഎസിൽ വെച്ച് കസ്റ്റഡിയിലായിരുന്നു.