അന്താരാഷ്ട്ര ഹെൽത്ത്കെയർ കമ്പനിയായ നോവോ നോർഡിസ്കിന്റെ ടൈപ്പ് 2 പ്രമേഹ ചികിത്സയ്ക്കുള്ള മരുന്നായ 'ഒസെമ്പിക്' ഇന്ത്യയിൽ ലഭ്യമാക്കുന്നു. നിയന്ത്രണവിധേയമല്ലാത്ത ടൈപ്പ് 2 ഡയബറ്റിസ് മെലിറ്റസ് ഉള്ള പ്രായപൂർത്തിയായ രോഗികൾക്ക്, ഭക്ഷണക്രമീകരണത്തിനും വ്യായാമത്തിനുമൊപ്പം ആഴ്ചയിലൊരിക്കൽ നൽകാവുന്ന ഒരു കുത്തിവയ്പ്പ് ആണിത്. (Diabetes)
ലോകാരോഗ്യ സംഘടനയുടെ 2023-24 ലെ കണക്കുകൾ പ്രകാരം, 101 ദശലക്ഷം (ഇന്ത്യൻ ജനസംഖ്യയുടെ ഏകദേശം 11.4 ശതമാനം) ആളുകളാണ് പ്രമേഹവുമായി ജീവിക്കുന്നത്. അതായത്, ചൈനയ്ക്ക് ശേഷം ലോകത്തിലെ ഏറ്റവും വലിയ രണ്ടാമത്തെ പ്രമേഹബാധിത ജനസംഖ്യയാണ് ഇന്ത്യയിലേത്. കൂടാതെ, ഇന്ത്യയിൽ പ്രീ-ഡയബറ്റിസ് ബാധിച്ച 136 ദശലക്ഷം വ്യക്തികളും അമിതമായ ശരീരഭാരവുമായി ജീവിക്കുന്ന 254 ദശലക്ഷം ആളുകളും ഉണ്ടെന്നാണ് കണക്കുകൾ വ്യക്തമാക്കുന്നത്.
HbA1c കുറയ്ക്കുന്നതിനും ശരീരഭാരം ശ്രദ്ധേയമായ രീതിയിൽ കുറയ്ക്കുന്നതിനും ഉപാപചയ വ്യവസ്ഥ മെച്ചപ്പെടുത്തുന്നതിനും ഒസെമ്പിക് സഹായകമാകുന്നു. ഹൃദ്രോഗസാധ്യതയുള്ളവർക്കും അല്ലെങ്കിൽ ഹൃദ്രോഗങ്ങൾ നിർണ്ണയിക്കപ്പെട്ടവർക്കും ഉൾപ്പെടെ, HbA1c ≥= 7% നിലയിലുള്ള പ്രായപൂർത്തിയായവർക്കും ഇത് അനുയോജ്യമാണ്. ദീർഘകാലമായി നിലനിൽക്കുന്ന ടൈപ്പ് 2 ഡയബറ്റിസ് മെലിറ്റസ് ഉള്ളവരിലെ പ്രധാന ആശങ്കയായ കാർഡിയോവാസ്കുലാർ പ്രശ്നങ്ങൾ കുറയുന്നതായി കാണപ്പെടുന്നു. കൂടാതെ, ഗുരുതരമായ വൃക്ക രോഗങ്ങൾ വഷളാകുന്നതിനെതിരെ സംരക്ഷണം നൽകുകയും ദീർഘകാല ആരോഗ്യത്തിന് പിന്തുണ നൽകുകയും ചെയ്യുന്നു.
ഒസെമ്പിക് ഇപ്പോൾ ഇന്ത്യയിൽ 0.25 മില്ലിഗ്രാം, 0.5 മില്ലിഗ്രാം, 1 മില്ലിഗ്രാം അളവുകളിൽ ഫ്ലെക്സ്ടച്ച് പെന്നിൽ ലഭ്യമാണ് - ഉപയോഗിക്കാൻ എളുപ്പമുള്ളതും ആഴ്ചയിൽ ഒരിക്കൽ മാത്രം ഉപയോഗിക്കാവുന്നതുമായ പെൻ ഡിവൈസാണിത്.