തിരുനെൽവേലി: പ്രായപൂർത്തിയാകാത്ത സ്വന്തം മകളെ രണ്ട് വർഷത്തോളം പീഡിപ്പിക്കുകയും ഗർഭിണിയാക്കുകയും ചെയ്ത 43-കാരനായ പിതാവിന് തിരുനെൽവേലി പോക്സോ കോടതി വധശിക്ഷ വിധിച്ചു. ഡിഎൻഎ പരിശോധനയിലൂടെ കുറ്റം തെളിയിക്കപ്പെട്ടതിനെത്തുടർന്നാണ് ജഡ്ജി സുരേഷ് കുമാർ ഈ അപൂർവ്വങ്ങളിൽ അപൂർവ്വമായ വിധി പുറപ്പെടുവിച്ചത്.
ക്രൂരത പുറത്തായത് 2025-ൽ
തിരുനെൽവേലി ജില്ലയിൽ നിന്നുള്ള മരംവെട്ടു തൊഴിലാളിയായ പ്രതിക്ക് രണ്ട് ഭാര്യമാരുണ്ട്. രണ്ടാമത്തെ ഭാര്യയിലും മൂന്ന് മക്കൾക്കുമൊപ്പമാണ് ഇയാൾ താമസിച്ചിരുന്നത്. സ്കൂൾ പഠനം നിർത്തിയ 15 വയസ്സുകാരിയായ മൂത്ത മകൾ വീട്ടുജോലികൾക്കായി വീട്ടിൽ നിൽക്കുന്ന സമയത്താണ് ഇയാൾ ക്രൂരമായ പീഡനത്തിന് ഇരയാക്കിയത്.
2025 ഫെബ്രുവരിയിൽ പെൺകുട്ടിക്ക് ശാരീരിക അസ്വസ്ഥതകൾ ഉണ്ടായതിനെത്തുടർന്ന് ആശുപത്രിയിൽ പ്രവേശിപ്പിച്ചപ്പോഴാണ് കുട്ടി അഞ്ച് മാസം ഗർഭിണിയാണെന്ന വിവരം പുറത്തറിയുന്നത്. തുടർന്ന് നടത്തിയ ചോദ്യം ചെയ്യലിൽ, കഴിഞ്ഞ രണ്ട് വർഷമായി പിതാവ് തന്നെ പീഡിപ്പിക്കുകയാണെന്ന് പെൺകുട്ടി വെളിപ്പെടുത്തി. കുട്ടിയുടെ അമ്മയുടെ പരാതിയിൽ വള്ളിയൂർ വനിതാ പോലീസ് പോക്സോ നിയമപ്രകാരം കേസെടുത്ത് പ്രതിയെ അറസ്റ്റ് ചെയ്യുകയായിരുന്നു.
ഡിഎൻഎ പരിശോധനയും കോടതി നിരീക്ഷണവും
തുടർന്ന് പെൺകുട്ടിക്ക് ഗർഭം അലസൽ സംഭവിച്ചു. ഇതിനെത്തുടർന്ന് ശേഖരിച്ച ടിഷ്യു സാമ്പിളുകൾ ഡിഎൻഎ പരിശോധനയ്ക്ക് അയച്ചു. 2025 ഒക്ടോബറിൽ ലഭിച്ച പരിശോധനാ റിപ്പോർട്ടിൽ പ്രതി തന്നെയാണ് കുട്ടിയുടെ പിതാവെന്ന് ശാസ്ത്രീയമായി തെളിയിക്കപ്പെട്ടു.
"ഒരു പിതാവിൽ നിന്ന് മകൾക്ക് നേരിടേണ്ടി വന്ന ഈ ആക്രമണം ഒരുകാലത്തും അംഗീകരിക്കാനാവില്ല" എന്ന് വിധിന്യായത്തിൽ ജഡ്ജി നിരീക്ഷിച്ചു. പ്രതിക്ക് വധശിക്ഷയ്ക്ക് പുറമെ 25,000 രൂപ പിഴയും വിധിച്ചു. കൂടാതെ, അതിജീവിച്ച പെൺകുട്ടിയുടെ കുടുംബത്തിന് പത്ത് ലക്ഷം രൂപ നഷ്ടപരിഹാരം നൽകാൻ തമിഴ്നാട് സർക്കാരിനോട് കോടതി ഉത്തരവിട്ടു.
പോലീസിന്റെയും പ്രോസിക്യൂഷന്റെയും വേഗത്തിലുള്ള നടപടികളെ തിരുനെൽവേലി എസ്.പി പ്രസന്നകുമാർ അഭിനന്ദിച്ചു. പ്രോസിക്യൂഷന് വേണ്ടി സർക്കാർ അഭിഭാഷക ഉഷ ഹാജരായി.