ന്യൂഡൽഹി: ലോകത്തിലെ കടുവകളിൽ 75 ശതമാനത്തോളം വസിക്കുന്ന ഇന്ത്യയിൽ കടുവകളുടെ മരണസംഖ്യ വർദ്ധിക്കുന്നതായി റിപ്പോർട്ട്. 2024-ൽ 124 കടുവകൾ ചത്തപ്പോൾ, കഴിഞ്ഞ വർഷം അത് 166 ആയി ഉയർന്നു. മുൻവർഷത്തെ അപേക്ഷിച്ച് 40 കടുവകളാണ് അധികമായി ചത്തത്.(Tiger mortality rate rising in India, 166 tigers died last year)
കടുവകളുടെ മരണത്തിൽ രാജ്യത്ത് ഒന്നാമത് മധ്യപ്രദേശാണ്. മധ്യപ്രദേശ്: 55, മഹാരാഷ്ട്ര: 38, കേരളം: 13, അസം: 12 എന്നിങ്ങനെയാണ് നിരക്ക്. ആകെ ചത്ത കടുവകളിൽ 31 എണ്ണം കുഞ്ഞുങ്ങളാണ്. ഈ വർഷത്തെ (2025) ആദ്യ കടുവ മരണം റിപ്പോർട്ട് ചെയ്തത് ജനുവരി 2-ന് മഹാരാഷ്ട്രയിലെ ബ്രഹ്മപുരി വനമേഖലയിലാണ്.
കടുവകളുടെ എണ്ണം വർദ്ധിക്കുന്നത് ആവാസവ്യവസ്ഥയിൽ പുതിയ വെല്ലുവിളികൾ സൃഷ്ടിക്കുന്നതായി വന്യജീവി വിദഗ്ധർ ചൂണ്ടിക്കാട്ടുന്നു. കടുവകളുടെ എണ്ണം കൂടുമ്പോൾ വനത്തിനുള്ളിൽ സ്ഥലപരിമിതി മൂലം സമ്മർദ്ദം അനുഭവപ്പെടുന്നു. അമ്മയോടൊപ്പം 20 മാസം ചിലവഴിച്ച ശേഷം പുതിയ പ്രദേശം തേടിപ്പോകുന്ന കടുവക്കുട്ടികൾ മുതിർന്ന കടുവകളുമായി ഏറ്റുമുട്ടുന്നത് മരണങ്ങൾക്ക് കാരണമാകുന്നു.
കടുവകളുടെ എണ്ണം 2018-ലെ 2,967-ൽ നിന്ന് 2022-ൽ 3,682 ആയി ഉയർന്നിട്ടുണ്ട് (6% വാർഷിക വളർച്ച). എണ്ണം കൂടുമ്പോൾ മനുഷ്യ-മൃഗ സംഘർഷം കുറയ്ക്കാനും പാരിസ്ഥിതിക ഇടനാഴികൾ സ്ഥാപിക്കാനും കൂടുതൽ നടപടികൾ ആവശ്യമാണ്. മധ്യപ്രദേശിൽ മാത്രം കഴിഞ്ഞ പത്ത് വർഷത്തിനിടെ കടുവകളുടെ എണ്ണത്തിൽ 60 ശതമാനം വർദ്ധനവാണ് ഉണ്ടായത്. 2014-ൽ 308 ആയിരുന്ന കടുവകൾ 2022-ൽ 785 ആയി വർദ്ധിച്ചു.