ചണ്ഡീഗഡ്: ചില വാഹന ബ്രാൻഡുകൾ ഉപയോഗിക്കുന്നവരെ ക്രിമിനലുകളുമായി ബന്ധപ്പെടുത്തി ഹരിയാന പോലീസ് മേധാവി ഒ.പി. സിങ് നടത്തിയ പരാമർശം വലിയ വിവാദത്തിലേക്ക്. ഥാർ, റോയൽ എൻഫീൽഡ് ബുള്ളറ്റ് എന്നീ വാഹനങ്ങൾ ഓടിക്കുന്ന എല്ലാവരും പ്രശ്നക്കാർ ആണെന്ന രീതിയിലായിരുന്നു ഡി.ജി.പി.യുടെ പ്രതികരണം.(Those who use Thar and Bullet are all troublemakers, Haryana DGP's statement is being discussed on social media)
വാഹനപരിശോധനയെക്കുറിച്ച് മാധ്യമങ്ങളോട് സംസാരിക്കവെയാണ് ഒ.പി. സിങ് വിവാദ പ്രസ്താവന നടത്തിയത്. "ഞങ്ങൾ എല്ലാ വാഹനങ്ങളും പരിശോധിക്കാറില്ല. ഥാർ ആണെങ്കിൽ, നമുക്ക് എങ്ങനെ അത് പരിശോധിക്കാതിരിക്കാൻ കഴിയും?... അല്ലെങ്കിൽ ബുള്ളറ്റ് മോട്ടർസൈക്കിളാണെങ്കിൽ... എല്ലാ ക്രിമിനലുകളും അത്തരം കാറുകളും ബൈക്കുകളും ഉപയോഗിക്കുന്നുണ്ട്."
"വാഹനം തിരഞ്ഞെടുക്കുന്നത് നിങ്ങളുടെ മാനസികാവസ്ഥയെ പ്രതിഫലിപ്പിക്കുന്നു. ഥാർ ഓടിക്കുന്ന ആളുകൾ റോഡിൽ അഭ്യാസ പ്രകടനങ്ങൾ നടത്തുന്നു." – ഒ.പി. സിങ് പറഞ്ഞു. ഒരു അസിസ്റ്റന്റ് പോലീസ് കമ്മീഷണറുടെ മകൻ ഥാർ ഓടിച്ച് ഒരാളെ ഇടിച്ചു വീഴ്ത്തിയ സംഭവവും ഡി.ജി.പി. ഉദ്ധരിച്ചു.
അസിസ്റ്റന്റ് കമ്മീഷണറുടെ മകൻ ഒരാളെ ഇടിച്ചിട്ട ശേഷം, മകനെ മോചിപ്പിക്കാൻ അദ്ദേഹം വിളിച്ചു. ഡി.ജി.പി.യുടെ ചോദ്യം: "കാർ ആരുടെ പേരിലാണ് രജിസ്റ്റർ ചെയ്തിരിക്കുന്നതെന്ന് ഞങ്ങൾ അദ്ദേഹത്തോട് ചോദിച്ചു. ഥാർ കമ്മീഷണറുടെ പേരിലായിരുന്നു. അതിനാൽ അദ്ദേഹവും കുഴപ്പക്കാരനാണ്." – സിങ് പറഞ്ഞു.
പോലീസുകാരുടെ പട്ടികയെടുത്താൽ എത്ര പേർക്ക് ഥാർ ഉണ്ടാകുമെന്ന് സഹപ്രവർത്തകരോടായി സിങ് ചോദിച്ചു. "അത് ആരുടെ കൈവശമുണ്ടെങ്കിലും അയാൾ പ്രശ്നക്കാരനായിരിക്കും. നിങ്ങൾക്ക് ഗുണ്ടായിസത്തിൽ ഏർപ്പെടാനും പിന്നീട് പിടിക്കപ്പെടില്ലെന്ന് പ്രതീക്ഷിക്കാനും കഴിയില്ല. നിങ്ങൾ പൊങ്ങച്ചം കാണിച്ചാൽ അതിൻ്റെ അനന്തരഫലങ്ങളും നേരിടേണ്ടിവരും" – സിങ് മുന്നറിയിപ്പ് നൽകി.
ഡി.ജി.പി.യുടെ പ്രസ്താവന സമൂഹമാധ്യമങ്ങളിൽ വൈറലായിട്ടുണ്ട്. ചിലർ ഡി.ജി.പി.യുടെ വാക്കുകളെ പിന്തുണച്ചപ്പോൾ, മറ്റു ചിലർ പോലീസ് നടപടിയെയും പൊതുവായി വാഹന ഉടമകളെ വിവേചനം കാണിക്കുന്നതിനെയും രൂക്ഷമായി വിമർശിച്ചു.