ഇംഫാൽ: ലോകത്തിന് നിലനിൽക്കണമെങ്കിൽ ഹിന്ദു സമൂഹം അനിവാര്യമാണെന്ന് ആർ.എസ്.എസ്. മേധാവി മോഹൻ ഭാഗവത് അഭിപ്രായപ്പെട്ടു. ലോകത്തെ നിലനിർത്തുന്നതിൽ ഹിന്ദു സമൂഹം നിർണ്ണായക പങ്ക് വഹിക്കുന്നുണ്ടെന്നും അദ്ദേഹം പറഞ്ഞു. മണിപ്പൂർ സന്ദർശന വേളയിൽ ഒരു സമ്മേളനത്തെ അഭിസംബോധന ചെയ്യുകയായിരുന്നു അദ്ദേഹം.(The world cannot survive without Hindus, says Mohan Bhagwat)
പഴയ നാഗരികതകളെ ഇന്ത്യ അതിജീവിച്ചതിനെ ചൂണ്ടിക്കാട്ടിയാണ് ഭാഗവത് ഹിന്ദു സമൂഹത്തിന്റെ പ്രാധാന്യം വിശദീകരിച്ചത്. യവന (ഗ്രീസ്), മിസ്ർ (ഈജിപ്ത്), റോം തുടങ്ങിയ സാമ്രാജ്യങ്ങളെയും നാഗരികതകളെയും ഇന്ത്യ അതിജീവിച്ചിട്ടുണ്ട്. ഈ നാഗരികതകളെല്ലാം ഭൂമുഖത്തുനിന്ന് നശിച്ചെങ്കിലും നമ്മുടെ നാഗരികത ഇപ്പോഴും നിലനിൽക്കുന്നു.
"ഭാരതം എന്നത് നാശമില്ലാത്ത നാഗരികതയുടെ പേരാണ്. കാരണം ഹിന്ദു സംസ്കാരം നമ്മുടെ സമൂഹത്തിൽ ഒരു ശൃംഖല സൃഷ്ടിച്ചിട്ടുണ്ട്, അതുകൊണ്ടാണ് ഹിന്ദു സമൂഹം എപ്പോഴും അവിടെ നിലനിൽക്കുന്നത്. ഹിന്ദുക്കൾ ഇല്ലാതായാൽ ലോകം ഇല്ലാതാകും," ഭാഗവത് പറഞ്ഞു.
മുസ്ലീങ്ങളും ക്രിസ്ത്യാനികളും ഒരേ പൂർവ്വികരുടെ പിൻഗാമികളായതിനാൽ ഇന്ത്യയിൽ എല്ലാവരും ഹിന്ദുവാണെന്ന് മോഹൻ ഭാഗവത് മുമ്പ് പറഞ്ഞിരുന്നു. രാഷ്ട്ര നിർമ്മാണത്തെക്കുറിച്ചും സുരക്ഷാ വിഷയങ്ങളെക്കുറിച്ചും ആർ.എസ്.എസ്. മേധാവി സംസാരിച്ചു. രാജ്യത്തെ ശക്തിപ്പെടുത്തുന്നതിന്, അതിന്റെ സമ്പദ്‌വ്യവസ്ഥ പൂർണ്ണമായും സ്വാശ്രയമാകണം. രാഷ്ട്ര നിർമ്മാണത്തിന് സൈനിക ശേഷിയും അറിവും ഒരുപോലെ പ്രധാനമാണെന്നും അദ്ദേഹം വ്യക്തമാക്കി.
നക്സലിസത്തെ സമൂഹം ഇനി സഹിക്കില്ലെന്ന് തീരുമാനിച്ചതുകൊണ്ടാണ് അവർ ഇല്ലാതായത്. ബ്രിട്ടീഷ് സാമ്രാജ്യത്തിൽ സൂര്യൻ ഒരിക്കലും അസ്തമിക്കാറില്ലായിരുന്നു. എന്നാൽ ഇന്ത്യയിൽ, അവരുടെ സൂര്യൻ അസ്തമിക്കാൻ തുടങ്ങിയിരുന്നു. 90 വർഷമായി ഞങ്ങൾ പരിശ്രമിക്കുകയാണ്. ആ ശബ്ദം അടിച്ചമർത്താൻ ഞങ്ങൾ ഒരിക്കലും അനുവദിച്ചില്ലെന്നും അദ്ദേഹം കൂട്ടിച്ചേർത്തു.