ന്യൂഡൽഹി: കോൺഗ്രസിനുള്ളിൽ അധികാര വികേന്ദ്രീകരണവും പരിഷ്കാരങ്ങളും ആവശ്യമാണെന്ന ദിഗ്വിജയ് സിങ്ങിന്റെ പ്രസ്താവനയെ ശശി തരൂർ എം.പി പിന്തുണച്ചു. പാർട്ടിയെ താഴെത്തട്ട് മുതൽ ശക്തിപ്പെടുത്തേണ്ടതിന്റെ ആവശ്യകത ഊന്നിപ്പറഞ്ഞ തരൂർ, ദിഗ്വിജയ് സിങ്ങുമായി താൻ ഇക്കാര്യങ്ങൾ സംസാരിക്കാറുണ്ടെന്നും വ്യക്തമാക്കി.(The organization must be strengthened, Shashi Tharoor supports Digvijaya Singh)
പാർട്ടിക്കുള്ളിൽ പരിഷ്കാരങ്ങൾ വേണമെന്ന വാദങ്ങൾ ഉയർന്നുവരുന്ന സാഹചര്യത്തിൽ, സംഘടനയെ കൂടുതൽ കരുത്തുറ്റതാക്കുന്നതിൽ ഒരു സംശയവുമില്ലെന്ന് തരൂർ പറഞ്ഞു. ബി.ജെ.പിയിലും ആർ.എസ്.എസിലും സാധാരണ പ്രവർത്തകർക്ക് മുഖ്യമന്ത്രി, പ്രധാനമന്ത്രി തുടങ്ങിയ ഉയർന്ന പദവികളിലേക്ക് വളരാൻ സാധിക്കുന്നുണ്ടെന്ന് ദിഗ്വിജയ് സിങ് ചൂണ്ടിക്കാട്ടിയിരുന്നു. എൽ.കെ. അദ്വാനിയുടെ അരികിൽ നരേന്ദ്ര മോദി നിലത്തിരിക്കുന്ന പഴയ ചിത്രം പങ്കുവെച്ചുകൊണ്ടായിരുന്നു അദ്ദേഹത്തിന്റെ ഈ പരാമർശം.
പാർട്ടിയിൽ അധികാര വികേന്ദ്രീകരണം വേണമെന്നും തീരുമാനങ്ങൾ എടുക്കുന്നതിൽ താഴെത്തട്ടിലുള്ളവർക്ക് പങ്കാളിത്തം വേണമെന്നും ദിഗ്വിജയ് സിങ് നേരത്തെ ആവശ്യപ്പെട്ടിരുന്നു.