ന്യൂഡൽഹി: ദുബായ് എയർ ഷോയ്ക്കിടെ ഇന്ത്യ തദ്ദേശീയമായി വികസിപ്പിച്ച തേജസ് യുദ്ധവിമാനം തകർന്നുവീണ സംഭവത്തിൽ വ്യോമസേനയുടെ വിശദമായ അന്വേഷണം ആരംഭിച്ചു. വിമാനദുരന്തത്തിൽ വീരമൃത്യു വരിച്ച ധീരനായ പൈലറ്റ്, വ്യോമസേന വിങ് കമാൻഡർ നമൻഷ് സ്യാലിന്റെ (37) ഭൗതികശരീരം ഇന്ന് ഡൽഹിയിലെത്തിക്കും. ദുരന്തത്തിന്റെ യഥാർത്ഥ കാരണം കണ്ടെത്താനാണ് വ്യോമസേനയുടെ ശ്രമം.(The mortal remains of Wing Commander, who died in the Tejas aircraft crash, will be brought to Delhi today)
ഹിമാചൽ പ്രദേശ് കംഗ്ര സ്വദേശിയായ നമൻഷ് സ്യാലിന്റെ വിയോഗവാർത്ത നാടിനെയാകെ കണ്ണീരിലാഴ്ത്തിയിരിക്കുകയാണ്. ഹൈദരാബാദ് വ്യോമതാവളത്തിലായിരുന്നു അദ്ദേഹത്തിന് നിയമനം. ഇന്ത്യൻ വ്യോമസേനാ ഉദ്യോഗസ്ഥയായ ഭാര്യ അഫ്സാനും അഞ്ച് വയസ്സുള്ള മകൾക്കുമൊപ്പമാണ് അദ്ദേഹം ഹൈദരാബാദിൽ താമസിച്ചിരുന്നത്.
ഇന്ത്യയുടെ അഭിമാനമായ ലൈറ്റ് കോംബാറ്റ് എയർക്രാഫ്റ്റ് (LCA) തേജസ്, ദുബായ് അൽ മക്തൂം അന്താരാഷ്ട്ര വിമാനത്താവളത്തിനടുത്ത് ഇന്നലെ ഉച്ചയോടെയാണ് (യുഎഇ സമയം 2.15 pm, ഇന്ത്യൻ സമയം 3.45 pm) തകർന്നുവീണത്. എയർ ഷോയുടെ ആദ്യ റൗണ്ട് അഭ്യാസ പ്രകടനം പൂർത്തിയാക്കിയതിന് തൊട്ടുപിന്നാലെയായിരുന്നു അപകടം.
വ്യോമാഭ്യാസത്തിനിടെ രണ്ടുതവണ കുത്തനെ മുകളിലേക്കുയർന്നു കരണംമറിഞ്ഞ തേജസ്, മൂന്നാമതും ഇതാവർത്തിക്കാൻ ശ്രമിക്കുമ്പോഴാണ് നിയന്ത്രണം വിട്ട് താഴേക്ക് പതിക്കുകയും ഉഗ്രശബ്ദത്തോടെ പൊട്ടിത്തെറിക്കുകയും ചെയ്തത്. അപകടസമയത്ത് മലയാളികളടക്കം ആയിരക്കണക്കിന് കാണികൾ ഷോ കാണാൻ എത്തിയിരുന്നു.
അപകടം സംബന്ധിച്ച് ചില വിവരങ്ങൾ പുറത്തുവരുന്നുണ്ടെങ്കിലും അതൊന്നും വ്യോമസേന ഔദ്യോഗികമായി സ്ഥിരീകരിച്ചിട്ടില്ല. അപകടത്തിന് പിന്നിൽ അട്ടിമറി സാധ്യതയുണ്ടോ എന്നതിലും പ്രതിരോധ മന്ത്രാലയ വൃത്തങ്ങൾ പരിശോധന നടത്തുന്നുണ്ട്.
ദുരന്തകാരണത്തെക്കുറിച്ച് വിശദാന്വേഷണം നടത്തുമെന്ന് വ്യോമസേന വ്യക്തമാക്കിയിട്ടുണ്ട്. ഈ അന്വേഷണത്തിന്റെ റിപ്പോർട്ട് രാജ്യത്തിന് നിർണ്ണായകമാകും. അന്വേഷണ ചുമതല വ്യോമസേനയ്ക്കാണ്. സാങ്കേതിക തകരാറുകൾ, പൈലറ്റ് പിഴവ്, അട്ടിമറി സാധ്യതകൾ എന്നിവ പരിശോധിക്കും.
വിമാനദുരന്തത്തിൽ കേന്ദ്ര പ്രതിരോധമന്ത്രി രാജ്നാഥ് സിംഗ്, സംയുക്ത സൈനിക മേധാവി അനിൽ ചൗഹാൻ ഉൾപ്പെടെയുള്ളവർ അനുശോചനം രേഖപ്പെടുത്തി. "കുടുംബത്തിന്റെ ദുഃഖത്തിൽ പങ്കുചേരുന്നു," രാജ്നാഥ് സിംഗ് പ്രതികരിച്ചു. ദുബായ് സിവിൽ ഏവിയേഷൻ അതോറിറ്റി പ്രസിഡന്റ് ഷെയ്ഖ് അഹ്മദ് ബിൻ സയീദ് അൽ മക്തും, ഇന്ത്യൻ വ്യോമസേനയ്ക്കും നമൻഷ് സ്യാലിന്റെ കുടുംബത്തിനും കടുത്ത ദുഃഖം അറിയിച്ചു.
ദുബായ് എയർഷോ സംഘാടകരും അനുശോചനം അറിയിക്കുകയും വലിയ നഷ്ടത്തിൽ കുടുംബത്തിന് ഒപ്പം നിൽക്കുമെന്ന് ഉറപ്പുനൽകുകയും ചെയ്തു. "ധീരനായ പൈലറ്റിനെയാണ് രാജ്യത്തിന് നഷ്ടമായത്. വിങ് കമാൻഡർ നമാംശ് സ്യാലിന്റെ ധീരതയും രാജ്യത്തോടുള്ള പ്രതിബദ്ധതയും എന്നും ഓർമ്മിക്കപ്പെടും," ഹിമാചൽ മുഖ്യമന്ത്രി സുഖ്‌വീന്ദർ സിങ് സുഖു പറഞ്ഞു.
നമൻഷ് സ്യാൽ അവസാന നിമിഷം വരെയും തന്റെ കർത്തവ്യങ്ങൾ ഏറ്റവും ഉത്തരവാദിത്തത്തോടെ നിറവേറ്റിയെന്ന് പ്രിയപ്പെട്ടവർ അനുസ്മരിച്ചു. അച്ചടക്കത്തിന്റെയും മികച്ച സേവനത്തിന്റെയും പര്യായമായിരുന്നു അദ്ദേഹം.
ഹിന്ദുസ്ഥാൻ ഡെവലപ്‌മെന്റ് ഏജൻസിയും ഹിന്ദുസ്ഥാൻ എയ്‌റോനോട്ടിക്‌സ് ലിമിറ്റഡും സംയുക്തമായി വികസിപ്പിച്ച ലഘു യുദ്ധവിമാനമാണ് തേജസ്. 2016-ലാണ് ഇന്ത്യൻ വ്യോമസേനയ്ക്ക് കൈമാറിയത്. ഏറ്റവും ഭാരം കുറഞ്ഞതും ചെറുതുമായ സൂപ്പർസോണിക് കോംബാറ്റ് എയർക്രാഫ്റ്റുകളിൽ ഒന്നാണിത്.
ഇന്ത്യൻ വ്യോമസേനയുടെ കരുത്തും അഭിമാനവുമാണ് ഈ തദ്ദേശീയ പോർവിമാനം. ദുരന്തത്തിന്റെ കൂടുതൽ വിവരങ്ങൾക്കായി വ്യോമസേനയുടെ ഔദ്യോഗിക റിപ്പോർട്ടിനായി രാജ്യം കാത്തിരിക്കുകയാണ്.