മീററ്റ്: രാഷ്ട്രീയ അധികാരമല്ല, മറിച്ച് മുഴുവൻ ഹിന്ദു സമൂഹത്തെയും സംഘടിപ്പിക്കുകയാണ് ആർഎസ്എസിന്റെ പ്രഥമ ലക്ഷ്യമെന്ന് മോഹൻ ഭാഗവത്. ആർഎസ്എസ് ശതാബ്ദി ആഘോഷങ്ങളുടെ ഭാഗമായി മീററ്റിൽ ദേശീയ-അന്തർദേശീയ കായികതാരങ്ങളുമായി സംഘടിപ്പിച്ച സംവാദ പരിപാടിയിൽ സംസാരിക്കുകയായിരുന്നു അദ്ദേഹം.(The aim is to organise the entire Hindu community, says Mohan Bhagwat)
ജാതിയേക്കാൾ ഉപരിയായി ‘നാനാത്വത്തിലെ ഏകത്വത്തെയാണ്’ ഹിന്ദു എന്നത് കൊണ്ട് അർത്ഥമാക്കുന്നത്. ആരാധനാ രീതികളും ദൈവങ്ങളും വ്യത്യസ്തമായിരിക്കാമെങ്കിലും നമ്മുടെ സാംസ്കാരിക അടിത്തറ ഒന്നാണെന്ന് അദ്ദേഹം ഓർമ്മിപ്പിച്ചു. ഇന്ത്യ എന്ന ആശയം വെറും ഭൂമിശാസ്ത്രപരമായ അതിരുകളിൽ ഒതുങ്ങുന്നതല്ല. ശ്രീരാമൻ, ശ്രീകൃഷ്ണൻ, ബുദ്ധൻ, മഹാവീരൻ, വിവേകാനന്ദൻ, മഹാത്മാഗാന്ധി തുടങ്ങിയ മഹദ്വ്യക്തികളുടെ പാരമ്പര്യത്തിൽ നിന്നാണ് നാം പ്രചോദനം ഉൾക്കൊള്ളേണ്ടത്.
രാഷ്ട്രനിർമ്മാണം എന്നത് സമൂഹത്തിന്റെ മൊത്തത്തിലുള്ള ഉത്തരവാദിത്തമാണ്. സ്പോർട്സ് എന്ന മാധ്യമം ജനങ്ങളെ ഒരുമിപ്പിക്കുന്നതിൽ വലിയ പങ്ക് വഹിക്കുന്നു. രാജ്യത്തിന്റെ ഉന്നമനത്തിനായി നിസ്വാർത്ഥമായി പ്രവർത്തിക്കാൻ അദ്ദേഹം കായികതാരങ്ങളോട് ആഹ്വാനം ചെയ്തു. സംഘടനയെ പുറത്തുനിന്ന് വിലയിരുത്തുന്നതിന് പകരം ഉള്ളിൽ നിന്ന് മനസ്സിലാക്കാൻ ശ്രമിക്കണമെന്ന് മോഹൻ ഭഗവത് പറഞ്ഞു. ആർഎസ്എസിന്റെ അനുബന്ധ സ്ഥാപനങ്ങളുമായി ചേർന്ന് പ്രവർത്തിക്കാനും അദ്ദേഹം യുവാക്കളെ ക്ഷണിച്ചു.
ഉത്തർപ്രദേശിൽ പര്യടനം തുടരുന്ന മോഹൻ ഭഗവത് കഴിഞ്ഞ ദിവസങ്ങളിൽ മുഖ്യമന്ത്രി യോഗി ആദിത്യനാഥുമായും ഉപമുഖ്യമന്ത്രിമാരുമായും നിർണ്ണായക കൂടിക്കാഴ്ചകൾ നടത്തിയിരുന്നു. ആർഎസ്എസിന്റെ നൂറാം വാർഷികത്തോടനുബന്ധിച്ച് രാജ്യമെമ്പാടും നടക്കുന്ന വിപുലമായ പരിപാടികളുടെ ഭാഗമായാണ് മീററ്റിലെ ഈ സംവാദം സംഘടിപ്പിച്ചത്.
