Follow on Google News
പൂനെ : മുംബൈയ്ക്ക് സമീപം താനെയിലെ ഡോമിനോസ് പിസ്സ ഔട്ട്ലെറ്റിൽ നിയമവിരുദ്ധമായി സൂക്ഷിച്ചിരുന്ന 140 എൽപിജി (LPG) സിലിണ്ടറുകൾ അധികൃതർ പിടിച്ചെടുത്തു (Thane Domino’s Pizza Raid News). സുരക്ഷാ മാനദണ്ഡങ്ങൾ ലംഘിച്ചും അനധികൃതമായും സിലിണ്ടറുകൾ ശേഖരിച്ചതിനാണ് നടപടി. താനെയിലെ ഘോഡ്ബന്ദർ റോഡിലുള്ള (Ghodbunder Road) ഔട്ട്ലെറ്റിലാണ് താനെ ക്രൈം ബ്രാഞ്ചും സിവിൽ സപ്ലൈസ് ഉദ്യോഗസ്ഥരും സംയുക്തമായി പരിശോധന നടത്തിയത്.
ഏകദേശം 4.59 ലക്ഷം രൂപ വിലമതിക്കുന്ന 140 ഗ്യാസ് സിലിണ്ടറുകളാണ് പരിശോധനയിൽ കണ്ടെത്തിയത്. ഇതിൽ വാണിജ്യാവശ്യത്തിനുള്ള സിലിണ്ടറുകളും ഉൾപ്പെടുന്നു. കൃത്യമായ അനുമതിയില്ലാതെയും മതിയായ സുരക്ഷാ ക്രമീകരണങ്ങളില്ലാതെയും ഇത്രയധികം സിലിണ്ടറുകൾ ജനവാസ മേഖലയിലുള്ള ഔട്ട്ലെറ്റിൽ സൂക്ഷിച്ചത് വലിയ അപകടസാധ്യതയുണ്ടാക്കിയെന്ന് അധികൃതർ ചൂണ്ടിക്കാട്ടി.
അവശ്യസാധന നിയമം (Essential Commodities Act), സ്ഫോടകവസ്തു നിയമം എന്നിവ പ്രകാരം ഔട്ട്ലെറ്റ് മാനേജർക്കും ഉടമയ്ക്കുമെതിരെ കേസെടുത്തു. സിലിണ്ടറുകൾ വിതരണം ചെയ്ത ഏജൻസിയെക്കുറിച്ചും അന്വേഷണം ആരംഭിച്ചു.നഗരത്തിലെ മറ്റ് പ്രമുഖ ഹോട്ടലുകളിലും ഫാസ്റ്റ് ഫുഡ് ചെയിനുകളിലും സമാനമായ രീതിയിൽ ഗ്യാസ് സിലിണ്ടറുകൾ അനധികൃതമായി സൂക്ഷിക്കുന്നുണ്ടോ എന്ന് പരിശോധിക്കാൻ ജില്ലാ കളക്ടർ നിർദ്ദേശം നൽകി.
