ഹൈദരാബാദ്: തെലങ്കാന സംസ്ഥാനത്തിന്റെ മദ്യവിൽപന ചരിത്രത്തിലെ ഏറ്റവും ഉയർന്ന പ്രതിമാസ വരുമാനം 2025 ഡിസംബറിൽ രേഖപ്പെടുത്തി. 5,102 കോടി രൂപയാണ് ഡിസംബർ മാസത്തിൽ മാത്രം സംസ്ഥാന ഖജനാവിലേക്ക് എത്തിയത്. പുതുവത്സരാഘോഷങ്ങൾക്കൊപ്പം സംസ്ഥാനത്ത് നടന്ന തദ്ദേശ തിരഞ്ഞെടുപ്പും വിൽപന കുതിച്ചുയരാൻ കാരണമായെന്നാണ് വിലയിരുത്തൽ.
ഡിസംബറിൽ മാത്രം 5,102 കോടി രൂപയാണ് മദ്യവില്പനയിലൂടെ സർക്കാർ ഖജനാവിൽ എത്തിയത്. ഡിസംബർ 31-ന് മാത്രം 352 കോടി രൂപയുടെ മദ്യമാണ് വിറ്റുപോയത്. ഡിസംബർ 30-ലെ 375 കോടി കൂടി ചേർത്താൽ വെറും 48 മണിക്കൂറിനുള്ളിൽ 727 കോടി രൂപയുടെ വിൽപന നടന്നു.
പുതുവത്സര അവധിക്കാലത്തെ ആഘോഷങ്ങൾക്കൊപ്പം ഗ്രാമീണ തെലങ്കാനയിൽ നടന്ന തദ്ദേശ തിരഞ്ഞെടുപ്പും ഉപഭോഗം വർധിപ്പിച്ചു.
മുൻപന്തിയിലുള്ള ജില്ലകൾ: വറങ്കൽ, നൽഗൊണ്ട, മഹ്ബൂബ്നഗർ എന്നീ ജില്ലകളിലാണ് ശരാശരിയേക്കാൾ ഉയർന്ന വിൽപന റിപ്പോർട്ട് ചെയ്തത്.
ഡിസംബറിലെ ആദ്യ മൂന്നാഴ്ചകളിൽ തന്നെ മദ്യവിൽപനയിൽ വലിയ വർധനവ് പ്രകടമായിരുന്നുവെന്ന് എക്സൈസ് വകുപ്പ് അധികൃതർ വ്യക്തമാക്കി. തിരഞ്ഞെടുപ്പ് കാലത്തെ മദ്യവിതരണം കർശനമായി നിരീക്ഷിച്ചിരുന്നെങ്കിലും ആഘോഷ സീസൺ കൂടി വന്നതോടെ വരുമാനം റെക്കോർഡിലെത്തുകയായിരുന്നു.