ന്യൂഡൽഹി: ദുബായ് എയർ ഷോയിൽ ഇന്ത്യൻ വ്യോമസേനയുടെ തേജസ് യുദ്ധവിമാനം തകർന്നു വീണ ദാരുണ സംഭവത്തിൽ, അപകട ദൃശ്യങ്ങൾ പൊട്ടിച്ചിരിച്ചുകൊണ്ട് പകർത്തിയ പാകിസ്ഥാൻ മാധ്യമപ്രവർത്തകനെതിരെ രൂക്ഷ വിമർശനം. പൈലറ്റിൻ്റെ മരണത്തിൽ സന്തോഷം പ്രകടിപ്പിച്ചുകൊണ്ടുള്ള ഇയാളുടെ വീഡിയോ സാമൂഹിക മാധ്യമങ്ങളിൽ വ്യാപകമായി പ്രചരിച്ചതോടെയാണ് പ്രതിഷേധം ശക്തമായത്.(Tejas fighter jet crash, Pakistani journalist who filmed footage while laughing faces severe criticism)
ഒരു ഇന്ത്യൻ പൈലറ്റിന്റെ മരണം സംഭവിച്ച ദുരന്തത്തെ ചിരിച്ചുകൊണ്ട് അവതരിപ്പിച്ച മാധ്യമപ്രവർത്തകന്റെ നടപടി മനുഷ്യത്വരഹിതമാണ് എന്നാണ് നെറ്റിസൺസ് പ്രതികരിക്കുന്നത്. അപകടത്തിൽ മരിച്ച പൈലറ്റിനോട് പോലും അനാദരവ് കാണിച്ച മാധ്യമപ്രവർത്തകൻ 'മനുഷ്യത്വമില്ലാത്ത' പ്രവൃത്തിയാണ് ചെയ്തതെന്നും 'നാണമില്ലാതെ ചിരിക്കുന്നു' എന്നും ആരോപിച്ച് നിരവധി എക്സ് ഉപയോക്താക്കൾ രംഗത്തെത്തി.
മാധ്യമപ്രവർത്തകനെതിരെ നടപടിയെടുക്കണമെന്ന് യു.എ.ഇ. സർക്കാരിനോട് ചിലർ ആവശ്യപ്പെടുകയും ചെയ്തു. അതേസമയം, പാക് മാധ്യമപ്രവർത്തകന്റെ നടപടിക്ക് ക്ഷമ ചോദിച്ചുകൊണ്ട് നിരവധി പാകിസ്ഥാനി ഉപയോക്താക്കളും രംഗത്തെത്തി. "ആ പാകിസ്ഥാൻ മാധ്യമപ്രവർത്തകനുവേണ്ടി ഞങ്ങൾ ക്ഷമ ചോദിക്കുന്നു. തീർച്ചയായും ഇത് വലിയ നഷ്ടമാണ്, അഗാധമായ അനുശോചനം രേഖപ്പെടുത്തുന്നു," എന്ന് ഒരു പാകിസ്ഥാനി എക്സ് ഉപയോക്താവ് പ്രതികരിച്ചു.