ന്യൂഡൽഹി: എയർബസ് A320 ശ്രേണിയിലുള്ള വിമാനങ്ങളിലെ സാങ്കേതിക പ്രശ്നം കാരണം രാജ്യത്തെ 250-ഓളം വിമാന സർവീസുകൾക്ക് തടസ്സം നേരിടുകയോ വൈകുകയോ ചെയ്യുമെന്ന് അധികൃതർ അറിയിച്ചു. കടുത്ത സൗരവികിരണം കാരണം A320 ശ്രേണിയിൽപ്പെട്ട വിമാനങ്ങളുടെ ഫ്ലൈറ്റ് കൺട്രോൾ ഡേറ്റയ്ക്ക് തകരാർ സംഭവിക്കാമെന്ന് വിമാന നിർമ്മാണക്കമ്പനിയായ എയർബസ് മുന്നറിയിപ്പ് നൽകിയിരുന്നു.(Technical issue in Airbus A320 aircraft, 250 flights in the country may be affected)
ഇൻഡിഗോ, എയർ ഇന്ത്യ, എയർ ഇന്ത്യ എക്സ്പ്രസ് എന്നീ എയർലൈൻ കമ്പനികളുടെ വിമാനങ്ങൾക്കാണ് ഈ പ്രതിസന്ധി പ്രധാനമായും തടസ്സം സൃഷ്ടിക്കുക. തീവ്രമായ സൗരോർജ്ജ വികിരണം കാരണം A320 കുടുംബത്തിലെ ഗണ്യമായ എണ്ണം വിമാനങ്ങളിലെ സോഫ്റ്റ്‌വെയർ സംവിധാനം തകരാറിലായെന്നാണ് എയർബസ് അധികൃതർ അറിയിച്ചിരിക്കുന്നത്. ഈ പ്രശ്നം പരിഹരിക്കാൻ ആവശ്യമായ സോഫ്റ്റ്‌വെയർ മാറ്റങ്ങൾ പ്രവർത്തന തടസ്സങ്ങൾക്ക് കാരണമാകും.
എലിവേറ്റർ ഐലറോൺ കമ്പ്യൂട്ടർ (ELAC) സ്ഥാപിക്കാൻ എയർബസ് എയർലൈൻ ഓപ്പറേറ്റർമാരോട് ആവശ്യപ്പെട്ടതായി യൂറോപ്യൻ യൂണിയൻ ഏവിയേഷൻ സേഫ്റ്റി ഏജൻസി (EASA) അറിയിച്ചു. ഇന്ത്യൻ ഓപ്പറേറ്റർമാർക്ക് ഏകദേശം 560 A320 കുടുംബ വിമാനങ്ങളാണുള്ളത്. അതിൽ 200 മുതൽ 250 എണ്ണം വരെ സോഫ്റ്റ്‌വെയർ മാറ്റത്തിനോ ഹാർഡ്‌വെയർ പുനഃക്രമീകരണത്തിനോ വിധേയമാക്കേണ്ടതുണ്ട്.
നാരോ ബോഡിയുള്ള A320 ശ്രേണിയിലുള്ള വിമാനങ്ങളിൽ സോഫ്റ്റ്‌വെയർ മാറ്റം വരുത്തുന്നതുമായി ബന്ധപ്പെട്ട് പ്രവർത്തന തടസ്സങ്ങൾ ഉണ്ടാകുമെന്ന് വൃത്തങ്ങൾ അറിയിച്ചു. രാജ്യത്തെ ഏറ്റവും വലിയ വിമാനക്കമ്പനിയായ ഇൻഡിഗോ, എയർബസിൽ നിന്ന് അറിയിപ്പ് ലഭിച്ചതായി വ്യക്തമാക്കി. പ്രശ്ന പരിഹാരത്തിനായി എയർബസുമായി ചേർന്ന് പ്രവർത്തിക്കുകയാണെന്നും തടസ്സങ്ങൾ കുറയ്ക്കുന്നതിന് എല്ലാ ശ്രമങ്ങളും നടത്തുമെന്നും ഇൻഡിഗോ അറിയിച്ചു.
A320 ഫ്ലീറ്റിൽ സോഫ്റ്റ്‌വെയർ പരിഹരിക്കണമെന്ന മുന്നറിയിപ്പിനെ തുടർന്ന് അടിയന്തര മുൻകരുതൽ നടപടികൾ ആരംഭിച്ചതായി എയർ ഇന്ത്യ എക്സ്പ്രസ് പ്രസ്താവനയിൽ പറഞ്ഞു. എയർ ഇന്ത്യ എക്സ്പ്രസിന്റെ 31 വിമാനങ്ങളെ പ്രശ്നം ബാധിക്കുമെന്നും അവർ അറിയിച്ചു. തകരാറിലായ വിമാനങ്ങളുടെ കൃത്യമായ എണ്ണം മൂന്ന് വിമാനക്കമ്പനികളും ഇതുവരെ വെളിപ്പെടുത്തിയിട്ടില്ല.