ന്യൂഡൽഹി: സാങ്കേതിക തകരാറിനെത്തുടർന്ന് രാജ്യത്തെ പ്രധാന വിമാനത്താവളങ്ങളിൽ വിമാന സർവീസുകൾ തടസ്സപ്പെട്ടു. ഇന്ന് രാവിലെ 6.45 മുതൽ 7.30 വരെ 45 മിനിറ്റോളമാണ് ചെക്ക്-ഇൻ, ബുക്കിംഗ് നടപടികൾ മുടങ്ങിയത്. ഇൻഡിഗോ, ആകാശ എയർ, എയർ ഇന്ത്യ എക്സ്പ്രസ് തുടങ്ങിയ കമ്പനികളെയാണ് തകരാർ പ്രധാനമായും ബാധിച്ചത്.(Technical glitch at country’s airports, Services have been disrupted )
വിമാനക്കമ്പനികൾ റിസർവേഷൻ, ചെക്ക്-ഇൻ, ബോർഡിംഗ് എന്നിവയ്ക്കായി ഉപയോഗിക്കുന്ന നാവിറ്റെയർ സംവിധാനത്തിലുണ്ടായ തകരാറാണ് പ്രതിസന്ധിക്ക് കാരണമായത്. ഇതോടെ യാത്രക്കാർ ബുദ്ധിമുട്ടിലായി.
ഇൻഡിഗോ ഉൾപ്പെടെയുള്ള കമ്പനികൾ ഉടൻ തന്നെ ഇടപെടുകയും 25 മിനിറ്റിനുള്ളിൽ തങ്ങളുടെ ഭാഗത്തെ തകരാർ പരിഹരിക്കുകയും ചെയ്തു. രാവിലെ 8.25-ഓടെ രാജ്യത്തെ എല്ലാ വിമാനത്താവളങ്ങളിലും സംവിധാനം പൂർണ്ണമായി സജ്ജമായതായി അധികൃതർ അറിയിച്ചു. പ്രതിദിനം 1500-ലേറെ സർവീസുകൾ നടക്കുന്ന ഡൽഹിയിലും ആയിരത്തിലേറെ സർവീസുകൾ നടക്കുന്ന മുംബൈയിലും തകരാർ ബാധിച്ചിട്ടുണ്ട്.
