ജൗൻപൂർ: ഉത്തർപ്രദേശിലെ ജൗൻപൂരിലെ ഒരു സ്വകാര്യ സ്കൂളിൽ വിദ്യാർത്ഥികളെ അദ്ധ്യാപിക ക്രൂരമായി മർദ്ദിക്കുന്നതിന്റെ വീഡിയോ സമൂഹമാധ്യമങ്ങളിൽ വലിയ ഞെട്ടലുണ്ടാക്കി. പാഠങ്ങൾ പഠിക്കാത്തതിന് ക്ലാസിലെ ഒമ്പതോളം കുട്ടികളുടെ മുഖത്ത് അദ്ധ്യാപിക ആഞ്ഞടിക്കുന്ന ദൃശ്യങ്ങളാണ് പുറത്തുവന്നത്.(Teacher slaps students in UP, Controversy)
ഭ്ലുവാഹിനിയിലെ എൽ.ബി.എസ്. പബ്ലിക് സ്കൂളിൽ നിന്നുള്ളതാണ് ഈ വീഡിയോ. നീല സാരി ധരിച്ച അദ്ധ്യാപിക ഒരു കൈയിൽ മരവടിയും മറുകൈയിൽ പാഠപുസ്തകവുമായി ഓരോ കുട്ടിയുടെ അടുത്തേക്കും നീങ്ങുന്നത് വീഡിയോയിൽ കാണാം. "എന്തുകൊണ്ട് പാഠങ്ങൾ പഠിച്ചില്ല" എന്ന് ഹിന്ദിയിൽ ചോദിച്ചുകൊണ്ട് അദ്ധ്യാപിക കുട്ടികളുടെ മുഖത്ത് ആഞ്ഞടിക്കുന്നു. ചില കുട്ടികൾ ഒഴിഞ്ഞുമാറാൻ ശ്രമിക്കുമ്പോൾ, ഷർട്ടിൽ പിടിച്ച് വലിച്ചടുപ്പിച്ച് വീണ്ടും വീണ്ടും മുഖത്ത് അടിക്കുന്നതും ദൃശ്യങ്ങളിലുണ്ട്. ഈ സമയത്ത് ഭയം കാരണം കുട്ടികൾ പ്രതികരണമൊന്നും നടത്തുന്നില്ല.
കുട്ടികളോട് "എല്ലാ ഉത്തരവാദിത്തവും എന്റെതാണോ" എന്ന് അദ്ധ്യാപിക ആക്രോശിക്കുന്നത് കേൾക്കാം. യു.പിയിലെ ജൗൻപൂരിലെ ബദ്ലാപൂർ പോലീസ് സ്റ്റേഷൻ പരിധിയിലുള്ള ഭ്ലുഹിനിൽ നിന്നുള്ളതാണ് വീഡിയോ എന്ന് സമൂഹമാധ്യമ ഉപയോക്താക്കൾ പറയുന്നു. അദ്ധ്യാപികയുടെ ഈ അക്രമാസക്തമായ പെരുമാറ്റം അംഗീകരിക്കാനാവില്ലെന്നും ഇവർക്കെതിരെ നടപടി സ്വീകരിക്കണമെന്നും ആവശ്യപ്പെട്ട് നിരവധി പേർ സമൂഹമാധ്യമങ്ങളിൽ പ്രതിഷേധം രേഖപ്പെടുത്തി.