ന്യൂഡൽഹി: നിലവിൽ നടക്കുന്ന ദുബായ് എയർഷോയ്ക്ക് മുന്നോടിയായി ആകാശത്ത് കൗതുകക്കാഴ്ചയൊരുക്കി ഇന്ത്യൻ വ്യോമസേനയുടെ സൂര്യകിരൺ എയറോബാറ്റിക് ടീം. വിസ്മയിപ്പിക്കുന്ന പ്രകടനത്തിലൂടെ ആകാശത്ത് കൃത്യമായ ആകൃതിയിൽ ഹൃദയം വരച്ചാണ് സൂര്യകിരൺ ടീം ശ്രദ്ധാകേന്ദ്രമായത്. ഇതിൻ്റെ ചിത്രങ്ങൾ സമൂഹമാധ്യമങ്ങളിൽ വൈറലായിക്കൊണ്ടിരിക്കുകയാണ്.(Surya Kiran team draws a heart in Dubai's sky)
'ദുബായിയുടെ മനോഹരമായ ആകാശത്തിന് മുകളിലൂടെ പറന്നുയർന്ന്, സൂര്യകിരണുകൾ ഇന്ത്യൻ വ്യോമസേനയുടെ ആവേശവും കൃത്യതയും മികവും അഭിമാനത്തോടെ പ്രദർശിപ്പിച്ചു' എന്ന് ടീം 'എക്സി'ൽ കുറിച്ചു. ഈ പറക്കൽ 'അവിശ്വസനീയമായ അനുഭവം' ആണെന്നും അവർ വിശേഷിപ്പിച്ചു.
നവംബർ 18-ന്, ടീം ഒരു ഇൻവേർട്ടഡ് പാസ് (തലകീഴായി പറക്കൽ) പ്രകടനം നടത്തിയിരുന്നു. അതീവ ധൈര്യം ആവശ്യമുള്ള ഒന്നാണിത്. മേഘങ്ങൾക്കിടയിലൂടെയുള്ള പറക്കൽ എളുപ്പമല്ല. കാലാവസ്ഥയും കാഴ്ചാപരിധിയും നിമിഷങ്ങൾക്കകം മാറുമെങ്കിലും, ടീം ലീഡർ വേഗത്തിൽ ഡിസ്പ്ലേ പ്രൊഫൈൽ മാറ്റുന്നു. ഓരോ പൈലറ്റും അതീവ ശ്രദ്ധയും മികച്ച ഏകോപനവും നിലനിർത്തണമെന്നും ടീം 'എക്സി'ൽ കുറിച്ചു.
നൂറിലധികം വ്യോമസേനകൾ പങ്കെടുക്കുന്ന വലിയ അന്താരാഷ്ട്ര ഇവൻ്റാണ് ദുബായ് എയർഷോ. സഹകരണം വളർത്തുക, അത്യാധുനിക സാങ്കേതികവിദ്യകളെക്കുറിച്ച് വിവരങ്ങൾ കൈമാറ്റം ചെയ്യുക എന്നിവയാണ് ഈ പ്രദർശനത്തിൻ്റെ ലക്ഷ്യം.