ന്യൂഡൽഹി: തെരുവുനായ നിയന്ത്രണത്തിൽ കർശന നിലപാടുമായി സുപ്രീം കോടതി. തെരുവുനായ്ക്കളുടെ ആക്രമണത്തിൽ കുട്ടികൾക്കോ വയോധികർക്കോ പരിക്കേൽക്കുകയോ മരണം സംഭവിക്കുകയോ ചെയ്താൽ, ബന്ധപ്പെട്ട സംസ്ഥാന സർക്കാരുകൾ ഭീമമായ നഷ്ടപരിഹാരം നൽകേണ്ടി വരുമെന്ന് കോടതി മുന്നറിയിപ്പ് നൽകി.
ഭക്ഷണം നൽകുന്നവർക്കും ഉത്തരവാദിത്തം
തെരുവിൽ നായ്ക്കൾക്ക് ഭക്ഷണം നൽകുന്നവർക്കും അവയുടെ ആക്രമണങ്ങളുടെ കാര്യത്തിൽ ഉത്തരവാദിത്തമുണ്ടെന്ന് ജസ്റ്റിസുമാരായ വിക്രം നാഥ്, സന്ദീപ് മേത്ത, എൻ.വി. അഞ്ജരിയ എന്നിവരടങ്ങുന്ന പ്രത്യേക ബെഞ്ച് വ്യക്തമാക്കി. "നായ്ക്കൾക്ക് ഭക്ഷണം നൽകണമെന്ന് ആഗ്രഹമുള്ളവർ അവയെ സ്വന്തം വീട്ടിലേക്ക് കൊണ്ടുപോയി സംരക്ഷിക്കണം. പൊതുസ്ഥലങ്ങളിൽ നായ്ക്കൾ അലഞ്ഞുതിരിയുന്നതും ആളുകളെ കടിക്കുന്നതും അനുവദിക്കാനാവില്ല," കോടതി നിരീക്ഷിച്ചു. ഒമ്പത് വയസ്സുള്ള കുട്ടിയെ നായ ആക്രമിച്ചാൽ അതിന് മറുപടി പറയാൻ ആരുണ്ടെന്നും കോടതി ചോദിച്ചു.
വീഡിയോകൾ തെളിവ്; വാദങ്ങൾ തള്ളി
തെരുവുനായ്ക്കളെ സംരക്ഷിക്കണമെന്നാവശ്യപ്പെട്ട് എത്തിയ പല വാദങ്ങളും യാഥാർത്ഥ്യത്തിന് നിരക്കാത്തതാണെന്ന് കോടതി നിരീക്ഷിച്ചു. കുട്ടികളെയും വയോധികരെയും നായ്ക്കൾ ക്രൂരമായി ആക്രമിക്കുന്ന നിരവധി വീഡിയോകൾ തങ്ങൾക്ക് മുന്നിലുണ്ടെന്ന് കോടതി വ്യക്തമാക്കി. നായ്ക്കൾക്ക് തീറ്റ നൽകുന്ന സ്ത്രീകൾ പീഡിപ്പിക്കപ്പെടുന്നു എന്ന പരാതികൾ പരിശോധിക്കാൻ കോടതി വിസമ്മതിച്ചു. ഇത് ക്രമസമാധാന പ്രശ്നമാണെന്നും ആവശ്യമുള്ളവർക്ക് എഫ്.ഐ.ആർ ഫയൽ ചെയ്യാമെന്നും ബെഞ്ച് വ്യക്തമാക്കി.
തദ്ദേശ സ്ഥാപനങ്ങൾക്ക് വിമർശനം
തെരുവുനായ പ്രശ്നം കൈകാര്യം ചെയ്യുന്നതിൽ നഗരസഭകൾ ഉൾപ്പെടെയുള്ള തദ്ദേശ സ്ഥാപനങ്ങൾ പരാജയപ്പെട്ടതായി കോടതി ചൂണ്ടിക്കാട്ടി. നായ്ക്കളെ തെരുവിൽ നിന്ന് പൂർണ്ണമായി മാറ്റാൻ ഇപ്പോൾ ഉത്തരവിടുന്നില്ലെങ്കിലും, അനിമൽ ബർത്ത് കൺട്രോൾ (ABC) ചട്ടങ്ങൾ കൃത്യമായി പാലിക്കണമെന്ന് കോടതി കർശന നിർദ്ദേശം നൽകി.