ന്യൂഡൽഹി: ഇന്ത്യയിൽ സ്റ്റാർലിങ്ക് ഉപഗ്രഹ ഇന്റർനെറ്റ് സേവനം വാണിജ്യാടിസ്ഥാനത്തിൽ ആരംഭിക്കുന്നതിനുള്ള അവസാനഘട്ട നടപടികൾക്ക് തുടക്കമായി. നിലവിൽ സുരക്ഷാ പരിശോധനകളാണ് പുരോഗമിക്കുന്നത്. ഈ പരിശോധനകൾ വിജയകരമായി പൂർത്തിയാക്കിയാൽ 2026-ന്റെ തുടക്കത്തിൽ സ്റ്റാർലിങ്ക് ഇന്റർനെറ്റ് സേവനം രാജ്യത്ത് വാണിജ്യപരമായി ലഭ്യമാകും.(Starlink satellite internet security tests begin in India)
പരിശോധനകളും സ്പെക്ട്രവും
സ്റ്റാർലിങ്കിന്റെ ജെൻ 1 ഉപഗ്രഹ ശൃംഖല ഉപയോഗിച്ച് സെക്കന്റിൽ 600 ജിബി ബാൻഡ് വിഡ്ത്ത് സ്പെക്ട്രം ആണ് കമ്പനി ഇന്ത്യയിൽ ആവശ്യപ്പെടുന്നത്. ഈ സ്പെക്ട്രം സാധാരണ സുരക്ഷാ മാനദണ്ഡങ്ങൾ പാലിക്കുന്നതിനുള്ള പരീക്ഷണങ്ങൾക്കായി താൽക്കാലികമായി അനുവദിച്ചിട്ടുണ്ടെന്ന് കമ്പനി അറിയിച്ചു. സർക്കാർ നിബന്ധനകൾ അനുസരിച്ചുള്ള സാധാരണ നടപടിക്രമങ്ങളുടെ ഭാഗമായാണ് ഇപ്പോൾ സുരക്ഷാ പരിശോധനകൾ നടക്കുന്നത്.
ആദ്യം മുംബൈയിൽ
മുംബൈയിൽ ആയിരിക്കും സ്റ്റാർലിങ്ക് ഇന്റർനെറ്റ് ആദ്യം അവതരിപ്പിക്കുക എന്നാണ് ലഭ്യമായ വിവരം. നഗരത്തിൽ ഗ്രൗണ്ട് സ്റ്റേഷനുകൾ സ്ഥാപിക്കാനുള്ള പ്രവർത്തനങ്ങൾ കമ്പനി ആരംഭിച്ചു കഴിഞ്ഞു. മറ്റ് അടിസ്ഥാന സൗകര്യങ്ങൾ നിർമ്മിക്കുന്ന ജോലികളും പുരോഗമിക്കുകയാണ്. എല്ലാ അനുമതികളും ലഭിച്ചാൽ, മാസങ്ങൾക്കുള്ളിൽ സ്റ്റാർലിങ്കിന് ഇന്ത്യയിൽ സേവനം തുടങ്ങാനാവും.