കൊൽക്കത്ത: ഇന്ത്യൻ ക്രിക്കറ്റ് ടീം മുഖ്യപരിശീലകൻ ഗൗതം ഗംഭീറിന് കീഴിൽ ടീം ഇന്ത്യ മിന്നും വിജയങ്ങൾ സ്വന്തമാക്കുമ്പോഴും, അദ്ദേഹത്തിന് കടുത്ത മുന്നറിയിപ്പുമായി മുൻ നായകൻ സൗരവ് ഗാംഗുലി (Sourav Ganguly Warning Gautam Gambhir). 2025-ലെ ചാമ്പ്യൻസ് ട്രോഫിയും 2026-ലെ ടി20 ലോകകപ്പും ഇന്ത്യയ്ക്ക് നേടിക്കൊടുത്ത ഗംഭീറിന്റെ യഥാർത്ഥ പരീക്ഷണം 2027-ലെ ഏകദിന ലോകകപ്പായിരിക്കുമെന്ന് ഗാംഗുലി അഭിപ്രായപ്പെട്ടു. ദക്ഷിണാഫ്രിക്കയിൽ നടക്കുന്ന ലോകകപ്പിലെ സാഹചര്യങ്ങൾ ഗംഭീറിന് വെല്ലുവിളിയാകുമെന്നും അദ്ദേഹം ഓർമ്മിപ്പിച്ചു.
വൈറ്റ് ബോൾ ക്രിക്കറ്റിൽ ഗംഭീർ മികച്ച പരിശീലകനാണെന്ന് സമ്മതിക്കുമ്പോൾ തന്നെ, വിദേശ സാഹചര്യങ്ങളിൽ ടീമിനെ നയിക്കുന്നതാണ് അദ്ദേഹത്തിന്റെ വലിയ കടമ്പയെന്ന് ഗാംഗുലി ചൂണ്ടിക്കാട്ടി. “ഗംഭീറിന്റെ വൈറ്റ് ബോൾ ക്രിക്കറ്റിലെ യഥാർത്ഥ പരീക്ഷണം 2027-ലെ ദക്ഷിണാഫ്രിക്കൻ ലോകകപ്പായിരിക്കും. അവിടുത്തെ സാഹചര്യങ്ങൾ അദ്ദേഹത്തെ കഠിനമായി പരീക്ഷിക്കും. എങ്കിലും തന്റെ ടീമിനൊപ്പം അദ്ദേഹം അത് മറികടക്കുമെന്ന് എനിക്ക് വിശ്വാസമുണ്ട്,” ഗാംഗുലി മണി കൺട്രോളിന് നൽകിയ അഭിമുഖത്തിൽ പറഞ്ഞു.
ടെസ്റ്റ് ക്രിക്കറ്റിൽ ഗംഭീർ ഇനിയും മെച്ചപ്പെടാനുണ്ടെന്നും ഗാംഗുലി നിരീക്ഷിച്ചു. പിച്ചിനെക്കുറിച്ച് അമിതമായി ചിന്തിക്കുന്നത് ഒഴിവാക്കണമെന്നാണ് അദ്ദേഹത്തിന്റെ ഉപദേശം. “ചുവന്ന പന്തിൽ അദ്ദേഹം കൂടുതൽ ശ്രദ്ധിക്കണം. ഹോം ഗ്രൗണ്ടുകളിൽ അമിതമായി സ്പിന്നിനെ തുണയ്ക്കുന്ന പിച്ചുകൾ വേണമെന്ന് നിർബന്ധം പിടിക്കേണ്ടതില്ല. നല്ല പിച്ചുകൾ നല്ല ഫലങ്ങൾ നൽകും,” ഗാംഗുലി കൂട്ടിചേർത്തു.
വിമർശനങ്ങൾക്കിടയിലും ഗംഭീറിന് ഗാംഗുലി പൂർണ്ണ പിന്തുണ പ്രഖ്യാപിച്ചു. ഗംഭീർ ഒരു മികച്ച പരിശീലകനാണെന്നും അദ്ദേഹത്തിന് അർഹമായ സമയം നൽകണമെന്നും ദാദ പറഞ്ഞു. ഐപിഎൽ 2026 സീസണിന് ശേഷം ഗംഭീർ ഏകദിന, ടെസ്റ്റ് മത്സരങ്ങളിൽ കൂടുതൽ ശ്രദ്ധ കേന്ദ്രീകരിക്കും. വിരാട് കോഹ്ലി, രോഹിത് ശർമ്മ തുടങ്ങിയ സീനിയർ താരങ്ങളുടെ അവസാന ഏകദിന ലോകകപ്പാകാൻ സാധ്യതയുള്ള 2027-ൽ കിരീടം നേടുക എന്നത് ഗംഭീറിന് വലിയ ഉത്തരവാദിത്തമായിരിക്കും.
Summary: Legendary Indian captain Sourav Ganguly has stated that the “real test” for head coach Gautam Gambhir is yet to come, pointing toward the 2027 ODI World Cup in South Africa.
