മുംബൈ: ബോളിവുഡ് താരം സോനം കപൂറിനും ഭർത്താവ് ആനന്ദ് അഹൂജയ്ക്കും രണ്ടാമത്തെ കുഞ്ഞ് പിറന്നു (Sonam Kapoor Second Baby Boy). മാർച്ച് 29-ന് തങ്ങൾക്ക് ഒരു ആൺകുഞ്ഞ് ജനിച്ച വിവരം സോനം തന്നെയാണ് ഇൻസ്റ്റാഗ്രാമിലൂടെ ആരാധകരെ അറിയിച്ചത്. 2018-ൽ വിവാഹിതരായ ദമ്പതികൾക്ക് വായു എന്നൊരു മകൻ കൂടിയുണ്ട്.
“അങ്ങേയറ്റത്തെ കൃതജ്ഞതയോടെയും നിറഞ്ഞ സ്നേഹത്തോടെയും ഞങ്ങളുടെ ആൺകുഞ്ഞിന്റെ വരവ് അറിയിക്കുന്നു. കുടുംബം വളർന്നിരിക്കുന്നു, അവന്റെ വരവോടെ ഞങ്ങളുടെ ഹൃദയം കൂടുതൽ സ്നേഹത്താൽ നിറഞ്ഞു. അനിയനെ സ്വീകരിക്കുന്നതിൽ വായു അതീവ സന്തോഷവാനാണ്,” സോനം ഇൻസ്റ്റാഗ്രാമിൽ കുറിച്ചു. തങ്ങളുടെ ജീവിതത്തിലെ പുതിയ അധ്യായം ആരംഭിക്കുന്നതിൽ ഏറെ അനുഗ്രഹിക്കപ്പെട്ടവരായി കരുതുന്നുവെന്നും താരം കൂട്ടിച്ചേർത്തു.
View this post on Instagram
സോനത്തിന്റെ കുറിപ്പിന് പിന്നാലെ കരീന കപൂർ, റിയ കപൂർ, ഹുമ ഖുറേഷി തുടങ്ങി നിരവധി ബോളിവുഡ് താരങ്ങൾ ദമ്പതികൾക്ക് ആശംസകളുമായി എത്തി. 2025 നവംബറിലായിരുന്നു താൻ രണ്ടാമതും ഗർഭിണിയാണെന്ന വിവരം സോനം പുറത്തുവിട്ടത്. 2022 ഓഗസ്റ്റിലായിരുന്നു ആദ്യ മകൻ വായുവിന്റെ ജനനം.
