ന്യൂഡൽഹി: സോഷ്യൽ മീഡിയ പോസ്റ്റിന് താഴെ വന്ന മോശം കമന്റിനെച്ചൊല്ലിയുള്ള തർക്കം കൊലപാതകത്തിൽ കലാശിച്ചു (Social Media Dispute Murder). ഡൽഹിയിലെ മോതിയ ഖാൻ പ്രദേശത്ത് ഫെബ്രുവരി 20-ന് രാത്രിയാണ് സംഭവം നടന്നത്. കുത്തേറ്റ സതീഷ് എന്ന യുവാവ് ഹിന്ദു റാവു ആശുപത്രിയിൽ ചികിത്സയിലിരിക്കെയാണ് മരിച്ചത്. സംഭവവുമായി ബന്ധപ്പെട്ട് അമൻ (22) എന്ന യുവാവിനെ പോലീസ് അറസ്റ്റ് ചെയ്തു.
കൊല്ലപ്പെട്ട സതീഷിന്റെ കുടുംബത്തിലെ ഒരു യുവതി വിവാഹച്ചടങ്ങുമായി ബന്ധപ്പെട്ട് ഫെബ്രുവരി 20-ന് സോഷ്യൽ മീഡിയയിൽ ഒരു പോസ്റ്റ് പങ്കുവെച്ചിരുന്നു. ഇതിന് താഴെ വന്ന ആക്ഷേപകരമായ കമന്റിനെച്ചൊല്ലി ഇരുവിഭാഗങ്ങളും തമ്മിൽ ഫോണിലൂടെ രൂക്ഷമായ തർക്കവും ഭീഷണിയും ഉണ്ടായി. അന്ന് വൈകുന്നേരത്തോടെ ഇരു കുടുംബങ്ങളും നേരിട്ട് ഏറ്റുമുട്ടുകയും ഇതിനിടയിൽ അമൻ കത്തികൊണ്ട് സതീഷിനെ ആക്രമിക്കുകയുമായിരുന്നു. സതീഷിന്റെ ഭാര്യ സോണിയ നൽകിയ പരാതിയുടെ അടിസ്ഥാനത്തിൽ സദർ ബസാർ പോലീസ് കേസെടുത്ത് അന്വേഷണം ആരംഭിച്ചു. കൊലപാതകത്തിന് ഉപയോഗിച്ച ആയുധം പോലീസ് കണ്ടെടുത്തിട്ടുണ്ട്.
Summary: A man named Satish was stabbed to death in Delhi’s Motia Khan area following a heated dispute over an objectionable comment on a social media post.
