മുംബൈ: കഴിഞ്ഞ വർഷം റെക്കോർഡ് നേട്ടങ്ങൾ കൊയ്ത വെള്ളി വിലയിൽ പുതുവർഷത്തിന്റെ തുടക്കത്തിൽ വൻ ഇടിവ് രേഖപ്പെടുത്തി. എം.സി.എക്സ് വിപണിയിൽ ഒരു കിലോ വെള്ളിയുടെ വിലയിൽ 11,000 രൂപയോളമാണ് കുറഞ്ഞത്. 2,59,692 രൂപ വരെ ഉയർന്ന വില പിന്നീട് കുത്തനെ താഴ്ന്ന് 2,40,605 രൂപ എന്ന നിലയിലേക്ക് എത്തി.(Silver prices drop by Rs 11,000 per kg)
റഷ്യൻ എണ്ണ ഇറക്കുമതി ചെയ്യുന്ന രാജ്യങ്ങൾക്കെതിരെ 500% വരെ നികുതി ചുമത്താനുള്ള അമേരിക്കൻ പ്രസിഡന്റ് ഡൊണാൾഡ് ട്രംപിന്റെ നീക്കം ആഗോള വ്യാപാരത്തിൽ ഭീതി പടർത്തി. ഇത് നിക്ഷേപകരെ വെള്ളി വിപണിയിൽ നിന്ന് പിന്നോട്ട് വലിച്ചു. 2025-ൽ 147 ശതമാനത്തോളം വളർച്ചയാണ് വെള്ളി വിലയിൽ ഉണ്ടായത്. ഈ നേട്ടത്തിന് പിന്നാലെ നിക്ഷേപകർ കൂട്ടത്തോടെ ലാഭമെടുക്കാൻ തുടങ്ങിയത് വില താഴാൻ കാരണമായി.
സ്പോട്ട് സിൽവർ വില 2.7 ശതമാനം കുറഞ്ഞ് 76 ഡോളറിലെത്തി. ഇത് ഇന്ത്യൻ വിപണിയിലും പ്രതിഫലിച്ചു. നിലവിൽ 2,40,000 രൂപ റേഞ്ചിൽ വെള്ളിക്ക് സപ്പോർട്ട് ലഭിച്ചേക്കാം. എന്നാൽ വില 2,35,000 രൂപയ്ക്ക് താഴേക്ക് പോയാൽ ഇനിയും 15,000 രൂപയോളം കുറയാൻ സാധ്യതയുണ്ടെന്ന് വിദഗ്ധർ മുന്നറിയിപ്പ് നൽകുന്നു. ആഗോള വിപണിയിൽ വില 82 ഡോളറിന് മുകളിൽ ക്ലോസ് ചെയ്താൽ മാത്രമേ ഇനി ഒരു തിരിച്ചുവരവ് പ്രതീക്ഷിക്കേണ്ടതുള്ളൂ.