മുംബൈ: മുംബൈയിലെ ശിവാജി നഗറിൽ 19 വയസ്സുകാരിയെ പട്ടാപ്പകൽ നടുറോഡിൽ വെടിവെച്ചു കൊന്നു. ശിവാജി നഗർ നിവാസിയായ ഷിഫ ഷെയ്ഖ് ആണ് കൊല്ലപ്പെട്ടത് (Shifa Shaikh Murder). സംഭവത്തിൽ തബസ്സും ഷെയ്ഖ് (25) എന്ന യുവതിയെയും കാമുകൻ നദീം (23) ഉൾപ്പെടെ നാലുപേരെയും പോലീസ് അറസ്റ്റ് ചെയ്തു. പ്രണയപ്പകയാണ് കൊലപാതകത്തിന് കാരണമെന്ന് പോലീസ് പറഞ്ഞു.
നദീമുമായി ഷിഫയും തബസ്സും പ്രണയത്തിലായിരുന്നു. ഇതേച്ചൊല്ലി ഇവർ തമ്മിൽ നേരത്തെ തർക്കങ്ങളുണ്ടായിരുന്നു. ചൊവ്വാഴ്ച ഉച്ചയ്ക്ക് സംസാരിക്കാനെന്ന വ്യാജേന ഷിഫയെ വിളിച്ചുവരുത്തിയ തബസ്സും, കൈവശം കരുതിയിരുന്ന തോക്ക് ഉപയോഗിച്ച് ഷിഫയുടെ മുഖത്തേക്ക് വെടിയുതിർക്കുകയായിരുന്നു. വെടിയുണ്ട കവിളിലൂടെ തുളച്ചുകയറി തലയോട്ടിയിൽ തറച്ചു. ഉടൻ തന്നെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
തബസ്സുമിന്റെ സഹോദരൻ സാജിദ് ഷെയ്ഖ്, സുഹൃത്ത് കലാം ചൗധരി എന്നിവരെയും പോലീസ് പിടികൂടിയിട്ടുണ്ട്. കൊലപാതകത്തിനായി തോക്ക് നൽകിയതും ഗൂഢാലോചന നടത്തിയതും ഇവരാണെന്ന് പോലീസ് കണ്ടെത്തി. ആയുധ നിയമപ്രകാരവും കൊലക്കുറ്റത്തിനുമാണ് ഇവർക്കെതിരെ കേസെടുത്തിരിക്കുന്നത്. പ്രണയബന്ധങ്ങളെച്ചൊല്ലിയുള്ള തർക്കം ക്രൂരമായ കൊലപാതകത്തിൽ കലാശിച്ചത് മുംബൈ നഗരത്തെ ഞെട്ടിച്ചിരിക്കുകയാണ്.
Summary: In a case of a fatal love triangle, 19-year-old Shifa Shaikh was shot dead by Tabassum Shaikh, the other partner of her boyfriend, in Mumbai’s Shivaji Nagar.
