ന്യൂഡൽഹി: റഷ്യൻ പ്രസിഡന്റ് വ്ലാഡിമിർ പുടിന് വേണ്ടി രാഷ്ട്രപതി ഭവനിൽ ഒരുക്കിയ അത്താഴ വിരുന്നിൽ ഡോ. ശശി തരൂർ (Shashi Tharoor) എംപി പങ്കെടുത്തത് കോൺഗ്രസ് ഹൈക്കമാൻഡിന്റെ കടുത്ത അതൃപ്തിക്ക് വഴിവെച്ചു. പ്രതിപക്ഷ നേതാക്കളെ ക്ഷണിക്കാത്ത ചടങ്ങിൽ തരൂർ പങ്കെടുത്തതാണ് നേതൃത്വത്തെ ചൊടിപ്പിച്ചത്.
ഇന്നലെ രാത്രി രാഷ്ട്രപതി ഭവനിൽ നടന്ന ഈ വിരുന്നിലേക്ക് രാഹുൽ ഗാന്ധി, മല്ലികാർജുൻ ഖാർഗെ ഉൾപ്പെടെയുള്ള പ്രതിപക്ഷ നേതാക്കൾക്ക് ക്ഷണമുണ്ടായിരുന്നില്ല. ഇത് പ്രോട്ടോക്കോൾ ലംഘനമാണെന്ന് ചൂണ്ടിക്കാട്ടി കോൺഗ്രസ് നേരത്തെ തന്നെ വിമർശനം ഉന്നയിച്ചിരുന്നു.
എന്തുകൊണ്ടാണ് പ്രതിപക്ഷത്തെ പ്രധാന നേതാക്കളെ പരിപാടിയിൽ നിന്ന് ഒഴിവാക്കിയത് എന്ന് അറിയില്ലെന്നും, വിരുന്നിൽ പങ്കെടുത്തവർ ഇതിന് മറുപടി പറയണമെന്നും കോൺഗ്രസ് വക്താവ് പവൻ ഖേര പ്രതികരിച്ചു. തനിക്ക് ക്ഷണം ലഭിച്ചിരുന്നെങ്കിൽ താൻ പോകില്ലായിരുന്നെന്നും അദ്ദേഹം കൂട്ടിച്ചേർത്തു.
ക്ഷണിക്കാത്തതിനെപ്പറ്റി തനിക്ക് അറിയില്ലെന്നും, തന്നെ സംബന്ധിച്ചിടത്തോളം ക്ഷണം ലഭിച്ചതിനാൽ പങ്കെടുക്കുമെന്നും വിരുന്നിന് മുൻപ് തന്നെ ശശി തരൂർ നിലപാട് വ്യക്തമാക്കിയിരുന്നു. എന്നാൽ, പ്രധാന പ്രതിപക്ഷ നേതാക്കളെ ഒഴിവാക്കിയ ചടങ്ങിൽ തരൂർ പങ്കെടുത്തത് പാർട്ടി നേതൃത്വത്തിന് കടുത്ത നീരസമുണ്ടാക്കിയിട്ടുണ്ട്. രാജ്യം സന്ദർശിക്കുന്ന രാഷ്ട്രത്തലവന്മാർക്ക് അത്താഴവിരുന്ന് നൽകി ആദരിക്കുന്നത് ദീർഘകാല പാരമ്പര്യമാണെങ്കിലും, ഈ സാഹചര്യത്തിൽ തരൂരിന്റെ നടപടി പാർട്ടിക്ക് സ്വീകാര്യമായിട്ടില്ല.
Congress high command is reportedly unhappy with senior MP Shashi Tharoor for attending a dinner reception organized for Russian President Vladimir Putin at Rashtrapati Bhavan. The controversy stems from the fact that key opposition leaders, including Rahul Gandhi and Mallikarjun Kharge, were not invited to the event, which the Congress party criticized as a breach of protocol. Tharoor had stated prior to the event that he would attend since he received an invitation, a decision that has led to significant discontent within the party leadership.