ന്യൂഡൽഹി: ഡൽഹിയിലും പരിസര സംസ്ഥാനങ്ങളിലും ശൈത്യതരംഗം അതിരൂക്ഷമായി തുടരുന്നു. കനത്ത പുകമഞ്ഞ് മൂലം ദൃശ്യപരിധി കുറഞ്ഞതോടെ ഡൽഹി വിമാനത്താവളത്തിൽ നിന്നുള്ള നിരവധി സർവീസുകൾ വൈകി. റോഡ്-റെയിൽ ഗതാഗതത്തെയും മഞ്ഞ് സാരമായി ബാധിച്ചിട്ടുണ്ട്.(Severe cold wave in North India, Flights delayed in Delhi)
ഡൽഹിയിൽ ഇന്ന് രേഖപ്പെടുത്തിയ ഏറ്റവും കുറഞ്ഞ താപനില 4.3 ഡിഗ്രി സെൽഷ്യസ് ആണ്. വരും ദിവസങ്ങളിലും തണുപ്പ് തുടരുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. തണുപ്പ് കഠിനമായ സാഹചര്യത്തിൽ നോയിഡയിലും ഗാസിയാബാദിലും സ്കൂളുകൾക്ക് നാളെ വരെ അവധി നീട്ടി നൽകി.
ഉത്തർപ്രദേശ്, രാജസ്ഥാൻ, ഹരിയാന എന്നിവിടങ്ങളിലും പുകമഞ്ഞ് രൂക്ഷമാണ്. ദൃശ്യപരിധി കുറഞ്ഞതിനാൽ ട്രെയിനുകൾ മണിക്കൂറുകളോളം വൈകിയാണ് ഓടുന്നത്. തണുപ്പിനൊപ്പം ഡൽഹിയിലെ വായുനിലവാരവും (AQI) മോശമായി തുടരുന്നു.