ഹൈദരാബാദ്: രാജ്യത്തെ നടുക്കിയ 26 ആക്രമണങ്ങളുടെ സൂത്രധാരനും മാവോയിസ്റ്റ് കമാൻഡറുമായ മാദ്‌വി ഹിദ്മയെ (43) സുരക്ഷാ സേനയുമായുള്ള ഏറ്റുമുട്ടലിൽ വധിച്ചു. ആന്ധ്രാപ്രദേശിലെ അല്ലൂരി സീതാരാമ ജില്ലയിൽ (ASR District) നടന്ന ഏറ്റുമുട്ടലിൽ ഹിദ്മയുടെ ഭാര്യ രാജാക്ക (രാജെ) അടക്കം 6 മാവോയിസ്റ്റുകളാണ് കൊല്ലപ്പെട്ടത്.(Secret information provided by a trusted follower was crucial in the assassination of Madvi Hidma)
നൂറിലേറെ ജവാന്മാരെ ഇല്ലാതാക്കിയ ഹിദ്മയുടെ അന്ത്യം, കേന്ദ്ര ആഭ്യന്തരമന്ത്രി അമിത് ഷായുടെ നക്സൽ വിരുദ്ധ വേട്ടയിലെ ഏറ്റവും നിർണായകമായ വഴിത്തിരിവാണ്. 2026 മാർച്ചോടെ രാജ്യത്ത് നിന്ന് നക്സലിസം തുടച്ചുനീക്കാനുള്ള ലക്ഷ്യത്തിന് ഈ ഓപ്പറേഷൻ കരുത്ത് പകരും. കൊല്ലപ്പെട്ട ഹിദ്മ, മാവോയിസ്റ്റുകളുടെ ഏറ്റവും പ്രഹരശേഷിയുള്ള പി.എൽ.ജി.എ. ഒന്നാം ബറ്റാലിയന്റെ ഉന്നത കമാൻഡറായിരുന്നു.
നാല് തലത്തിലുള്ള സുരക്ഷാ വലയത്തിനുള്ളിൽ സുരക്ഷിതനായി കഴിഞ്ഞിരുന്ന ഹിദ്മയെക്കുറിച്ച് അടുത്തിടെ കീഴടങ്ങിയ ഒരു വിശ്വസ്ത അനുയായിയിൽ നിന്ന് ലഭിച്ച കൃത്യമായ വിവരങ്ങളാണ് ഓപ്പറേഷന് നിർണായകമായത്. ഹിദ്മയുടെ തലയ്ക്ക് പലപ്പോഴായി ഒരു കോടി രൂപ വരെ സർക്കാർ വിലയിട്ടിരുന്നു.
90-കളിൽ മാവോയിസ്റ്റ് ആശയങ്ങളിൽ ആകൃഷ്ടനായ ഹിദ്മ, വളരെ വേഗം സി.പി.ഐ. മാവോയിസ്റ്റ് കേന്ദ്ര കമ്മിറ്റിയിലെ ഏക ബസ്തർ ഗോത്രക്കാരനും പിന്നീട് സെൻട്രൽ മിലിട്ടറി കമ്മീഷൻ തലവനുമായി മാറി. ഹിദ്മ സൂത്രധാരനായ പ്രധാന ആക്രമണങ്ങൾ 76 സി.ആർ.പി.എഫ്. ജവാന്മാർ കൊല്ലപ്പെട്ട 2010 ദന്തേവാഡ ആക്രമണം, ഛത്തീസ്ഗഢ് കോൺഗ്രസിലെ പ്രതിപക്ഷ നേതാവ് അടക്കമുള്ള ഉന്നത നേതൃത്വത്തെ ഒന്നാകെ കൊലപ്പെടുത്തിയ 2013 ഝിറാം ഘാട്ടി ആക്രമണം, 21 സുരക്ഷാ സൈനികരെ വധിച്ച 2021 സുക്മ ആക്രമണം എന്നിവയാണ്.
ബസവ രാജുവിന്റെ വധത്തിനും വേണുഗോപാല റാവുവിന്റെ കീഴടങ്ങലിനും പിന്നാലെ മാദ്‌വി ഹിദ്മയും കൊല്ലപ്പെടുമ്പോൾ, സുരക്ഷാ സേനയ്ക്ക് ഇത് അതിനിർണായക നേട്ടമാണ്.